Season liamta Champions League final-ah Real Madrid-in Liverpool chu hnehin,Liverpool goalkeeper Karius-a’n vawihnih lai a tisual a ni kha. Nimin khan Liverpool hian pre-season match an khela, Tranmere tumin 3-2 in chak mahse Karius hian a ti sual leh.

Tranmere lamin free-kick an pet chu Karius hian man thelhin a thlauhva Tranmere hian an tih goal phah. Karius hian sawisel a tawk nasa hle a, Liverpool fan tam tak pawhin goalkeeper thar an duh hle. Media-te lam pawhin Karius a chet sual hi sawi nuam an ti a, a chet sual an chang reng a ni ber mai a, an bei nasa thei hle. Hemi chungchang hi Kop manager Jurgen Klopp chuan, “Tha taka game eng emaw zat a khelh leh phawt loh chuan tiang hian an bei reng dawn a, thil nih dan ve reng a ni. Kan tan tih theih a awm lova, tha taka khelh zel mai kan tum tur a ni.” a ti.

Tranmere laka a goalkeeper-in goal a chhuahdan chungchang sawiin, “ Save chu a save thei chiang alawm mahse thil awlsam a nilo, khatiang ang kha vawi tam tak a hmu tawh thin a, thil thleng thei reng a ni. Tihsual vawikhat avangin engkim kan tan tha ziah thei lova, tih sualte chu a awm lo thei lo a ni. Ka duhdan a ni bik lova, a duhdan pawh a ni lova, in duhdan a nih pawh ka ring lo,mahse tihsual hi a awm lo thei lo.” tiin Karius-a thlavang a hauh na hle.

Sawi belh zelin, “ Goal hnihna an rawn thun kha Milner-a leh Chirivella-te tihsual vanga lut a ni a, player tha tak tak pahnihte tihsual vanga lut a ni, mahse tuman kan sawi zui lo.” a ti bawk.

Liverpool hian Roma goalkeeper Alisson Becker dawr nasa hle mahse Roma hian a man an chhiar to lutuk avangin Liverpool lam hian Karius hi hman chhunzawm an tum ta zawk niin a lang.