Liverpool chuan Anfield-ah Napoli hnehin Champions League round of 16-ah a inpet kai a, he inkhelah hian Liverpool hian hnehna chang zo lo se chu Europa League bak an khel pha dawn lo.

First half-ah Mohamed Salah chuan goal a khunga, Liverpool hian Salah goal hi an chakpui. Hun tawp dawnah Napoli hian an si phurh an sut teuh hle a, mahse Liverpool goalkeeper Alisson Becker a che bawn hle a, Liverpool hi Brazilian goalkeeper manto avanga knock-out stage lut pawh an tih theih awm e. Mual veilam atangin Napoli hian injury time-ah Reds box chhungah ball an vawrh luta, Arkadiusz Milik chuan hnai tak atangin lo pet mahse Alisson hian a lo dang.

Inkhel zawhah Liverpool manager Jurgen Klopp chuan Alisson chu heti ang taka tha a ni tih chu hria se, a man an sen let pawh sen a inhuam tur thu a sawi. Liverpool hian Alisson hi tun nipui lai khan Roma atangin pound maktaduai 67-in an lalut a, goalkeeper manto ber ni zet mahse a hnu lawkah Chelsea goalkeeper Kepa Arrizabalaga chuan a khum lehnghal. Klopp chuan, “Kan goalie khan a save ropui kher mai. Engtin nge a save pawh ka hre lo.

“Alisson kan nei hi chu ka lawm hle a ni. Heti ang taka tha a ni tih hi chu hria ila, a man kan sen let pawh kha sen ka inhuam ang. Khati angah kha chuan tumahin a save an rin ka ring bik lo. Napoli lakah Alisson kha a buai hle a, mahse amah hi a ‘cool’ em em reng. Khatiang em em a buailo tur khan a thiante puihna chu a mamawh deuh a ni,” a ti.