​Klopp-a’n a player-te a fak

15th April 2019, 04:04PM

Premier League inkhel pawimawh takah Liverpool chuan Anfield-ah Chelsea chu si hnih faiin an lo hneha, he inkhela a naute khelh dan chu Liverpool manager Jurgen Klopp chuan a fak.

Sadio Mane leh Mohamed Salah-te goal hmangin Liverpool hi an chak a, tunah hian league hmahruaitu ni leh thawhin pahnihnaa awm Manchester City aiin point hnihin an sang zawka, khelh khatin an khel tam zawk.

Chelsea an khelh chungchang sawiin Klopp chuan, “Kan khelhpui te kha team tha tak niin khelhpui an harsa a, mahse kan khel tha hle. Inkhel kha a tam zawk kan thunun a, 2-0 a niha an kalhmang an thlak hma zawng kha chuan inkhel kan thunun.

“Kan khel kha a dik a, theihtawp chhuahin tih loh pawh kan nei lo. Thli chungchang sawi hi in phallo tih pawh ka hria a, mahse ka sawi leh dawn. First half-ah khan thli tleh lam hawi zawngin kan khel a, mahse second half-ah erawh kan hnung lamah a awm tawh, heta tang hian team hnihte tan thli beng zawnga khelh a harsat zia a lang,” a ti.

Liverpool hian khelh li chiah khelh tur an nei tawh a, hnehna an chan vek chuan an champion mai lovang tih a sawi theih ta hauh lo. Team tha tum tur Liverpool hian an nei tawh lova, Manchester City erawhin Premier League-ah Tottenham leh Manchester United tum tur an la nei.

Klopp chuan an khelh hmabakah hnehna an chan vek theih dawn leh theih dawn loh chungchang sawiin, “ Khelh li kan la nei a, hnehna kan chang vek thei dawn em ka hrelo, mahse kan tum a ngai dawn a, chu chu thil nihdan pawh a ni. Kan hmachhawn tur zawng zawngte hi kan zuam dawn lova, Cardiff pawh tlak hlauva khel an ni a, an vaiin khelhpui an harsa hle dawn.

“Season tluanin hetiang lam hi kan ngaihtuah lutuk lem lova, kan khelh apiangah chak kan duh a, Liverpool anga awm hi chuan kan chak fo reng bawk. Chelsea an that em avangin hnehna kan chang thei hi a pawimawh zual em em a, hnehna chang thei tura ka naute khelh dan kha an fakawm hle bawk a ni,” a ti.

Copyright © inkhel.com 2024. All rights reserved.