Sky Sports pundit Jamie Carragher, Graeme Souness leh Jamie Redknapp te chuan Brendan Rodgers-a thlaktu tur atan Borussia Dortmund manager hlui Jurgen Klopp chu an duh ber thu an sawi.
Tun season-a Liverpool chet chhiatpui em em Brendan Rodgers-a lakah Liverpool thuneitute leh fans tam tak te chuan rinna an nghat ngam tawh lova, Everton nen an inhnehtawk hnu lawk khan ban a nih thu Liverpool lam hian an puang chhuak ta a nih kha.
Liverpool player hluite hian Liverpool manager thar atan a an duh chungchang hi sawiin, "Ka thutlukna chu ni dawn se Ancelotti aiin Klopp hi Liverpool manager atan ka lalut zawk ang. Ancelotti hi manager tha tak chu a ni a, mahse club a enkawl thin te hi trophy chawi tura beisei te an ni thin.
"Tun dinhmunah erawh Liverpool hi trophy chawi lam aiin top 4 a inhlankai lam ngaihtuah a hmasa zawk a, Liverpool chakna thar pe a phurna pe thar thei tur chu Jurgen Klopp hi a ni" tiin a Jamie Carragher chuan a sawi.
Liverpool captain hlui Souness pawh tawng chhuak ve Ancelotti club enkawl thin chu player tha ber ber lalut thin an nih thu a sawi a, Liverpool erawh Dortmund nen club inang tak a nih thu sawiin Dortmund-in an player tha an chan chung pawha player naupang zawk te hmanga club tha tak ala din thar leh theih thinna chu Liverpool enkawl tura a duhna chhan ber a nih thu a sawi ve bawk a ni.
Jamie Redknapp pawhin Klopp a duhber thu sawiin fans te nen pawh boruak tha tak an neih theih a rinthu a sawi bawk a, Liverpool manager mamawh tak a nih thu a sawi bawk ve bawk a ni.