Liverpool striker thar Darwin Nunez chuan English Football-a insiamrem harsa a tih thu a sawi chhuak. Reds chuan nipui bazar inhawn lai khan he Uruguayan striker hi £64m in an lei a nih kha.

Premier League-a a inlan hmasak berah goal khung nghal mah se Crystal Palace a hmachhawn tumin red card a chawi a, match thum hrem a ni chhunzawm bawk.

Nunez chuan, "Kan inbe tam lo a, English ka hre thiam lo a, anni pawhin Spanish an hrethiam lo bawk," tiin tawng lama harsatna a neih thu a sawi.

Tuna Klopp-a coaching staff Pep Lijnders leh Vitor Matos te nen hian Benfica-ah khan an lo awm ho tawh a. Nunez chuan, "Anni hi ka tawng lettu an ni a, ka bulah an awm a, annin Klopp-a thusawi min leh sak thin.

"Annin min hrilhchhawn zel loh hi chuan coach-in khelh dan tur a ruahman ang hre hauh lovin mual chhungah ka lut ve mai thin.

"Hetih lai hian coach nen inkungkaihna tha kan nei a, min pui nasa em em bawk a, inrintawkna min pek bawk avangin mual chhungah ka rulh a ngai a ni," tiin kum 23 mi Darwin Nunez chuan a sawi.

Palace nen an inkhelh tumin red card a chawi, match thum hrem a ni chhunzawm bawk. A inkhelh leh theih hnuin Liverpool tan match 5 a khel leh tawh a, goal erawh a la khung leh lo. Thawhlehni zana si hnih faia Rangers an hneh tum khan starting XI a chang bawk a ni.

"A nihna takah chuan insiamrem hi a harsa ka ti deuh a ni. Training ground-ah leh game-ah ka insiam rem chho ve zel ang chu.

"Red card ka chawi chungchang kha chu a zia lo ka ti hle mai. Tihsual lian tak ka nei, tun hnuah a thleng leh tawh lo ang.

"Inkhelh chhungin ka inthunun thiam a ngai hle, tawng tam loh te ka mamawh a ni. Tu pawhin tihsual kan nei alawm, kei chu ka tihsual atang khan zirlai tha tak ka zir chhuak zel dawn a ni.

"Thil pawimawh tak nia ka hriat chu, team tana thil tha thlen a ni. Tha taka khelh a, thil ropui tak thawhchhuah a ni a, goal ka khung lo a nih pawhin dawhthei taka ka awm a ngai a ni.

"Goal ka khung chuan, goal dangin a chhunzawm dawn tih ka hria. Hetiang thil hi a hma pawhin ka lo tawng tawh thin, forward kan nih chuan goal khung tur kan ni a, mah se hahdam taka kan awm erawh a ngai.

"Tunah chuan hahdam takin ka awm, coach ten min pui nasa em em, ka team-mate te pawhin min pui nasa a, goal hmangin anni pawh puih let ka tum dawn a ni, goal ka khung lo a nih pawhin ka theihtawp ka chhuah sak zel ang," tiin Darwin Nunez chuan TNT Sports Brazil-in an kawmnaah a sawi chhuak.