Borussia Dortmund manager kalchhuak ta Jurgen Klopp chuan team thar a melh nghal lo va, football atangin chawlh lak rih a tum tih a sawi.

Kum 47 mi Klopp hian Dortmund a chhuahsan dawn tih a chian atangin Liverpool nen sawizawm nghal an ni a, mahse hei hi a thleng dik dawn ta lo niin a lang.

Klopp chuan, "Kum sarih chhung harsa leh hlimawm taka a liam hnuah kan hun hmante kha team ka enkawl leh hma chu cham reng rih se a tha in ka hria. Thu leh awm hma chu ka chawl rih ang." tiin a sawi.

Dortmund a enkawlna game hnuhnung berah Klopp hian hnehna a chanpui zo lo va, Inrinni zan khan German Cup final-ah 3-1 in Wolfsburg an hneh lo.

German manager hian kum 2008 khan Dortmund hi a enkawl tan a, Bundesliga-ah vawihnih champion puiin German Cup nomawi vawikhat a chawipui.

Kum 2013 khan Champions League final a luhpui bawk a, mahse final-ah hian an hmelma Bayern Munich an hneh lo va an champion zo ta lo.

Klopp thlak tur hian Mainz manager hlui Thomas Tuchel ruat fel a ni tawh a, tun season-ah khan a tirah che tha lo mahse season tawp lamah an che tha thung a season tharah Europa League an khel ang.