Heavyweight world champion lo ni tawh Wladimir Klitschko chuan boxing a chawlhsan thu a puang, Anthony Joshua nen an inhnek tha leh dawn ta lo.

Kum 41 mi Ukrainian hi April thla khan Wembley Stadium-ah Anthony Joshua khan Round 11-naah a knock out a, kumin chhunga inhnek nawn leh tur nia ngaih a nih laiin a chawl ta a ni.

Kum 27 mi Anthony Joshua leh Wladimir Klitschko te hi kumin November ni 11 hian Las Vegas-ah Rematch nei leh tura ruahman an ni a, mahse hei hi kan hmu thei dawn ta lo.

Wladimir Klitschko hi World Champion vawi hnih a lo ni tawh a, boxing a khelh chhungin vawi 64 hnehna a chang a, vawi 5 a tlawm.

"Boxing-a ka suangtuahna zawng zawngte ka hlenchhuak tawh, tunah chuan Sports ni lo lam zawka ka thil tumte ti turin bul tan ka duh ta a ni.

"Hetiang khawpa rei ka inkhel thei hi ka lawm a, ka beisei phak bak hlawhtlinna boxing-ah ka tawng bawk a ni," tiin Wladimir Klitschko chuan a sawi.

Kum 2006 atanga 2015 chhung zet Wladimir Klitschko hian title a hum thei a ni.