Chelsea leh Fulham an inhmachhawn tuma Josh King-a goal an pawmsak lo kha thutlukna dik lo tak a nih thu Professional Game Match Officials Limited chief Howard Webb chuan a sawi chhuak.

Inrinni liamta khan Stamford Bridge-ah Chelsea chuan Fulham an mikhual, First half minute 21-ah Fulham chuan counter attack an nei, kum 18 mi King chuan goal a khung.

VAR lam chuan referee Robert Jones hnenah halfwayline lama thil thleng enfiah turin thurawn a pe, Fulham goal a pawm lo tlat mai.

Halfwayline-ah Muniz chuan Chalobah a bum a, a ke a rah sak palh. Hei hi referee chuan foul hamna tlakah ngaiin, foul a ham ta a, Fulham goal a pawmsak ta lo a ni.

Kha thutlukna khan sawisel a hlawh hle. VAR duty Salisbury chu a bul tumtu a ni a, foul pawh kha a nihna takah chuan football-a thil thleng pangngai a ni a, goal pawmsak lohna tur atan chuan a nep mah mah a ni.

Salisbury hi Pathianni zana Liverpool leh Arsenal inkhelah VAR lama duty tur a nih leh laiin, Professional Game Match Officials Limited (PGMOL) chuan a hna an chawlh lailawktir ta a ni.

Kha match-ah khan Chelsea chuan si hnih faiin hnehna an chang a, Joao Pedro leh Enzo Fernandez ten goal an khung.

Match Officials Mic'd Up-ah PGMOL chief refereeing officer Webb chuan King-a goal an pawmsak lo kha thutlukna dik lo tak a nih thu a sawi chhuak.

"Kha thil kha sawi ho ngial ngai pawh a ni lo, thutlukna dik lo tak a ni e. Premier League game enkawl dan turah VAR inrawlhna tur chi hrang hrang duan a ni a, chu chu kha match-ah khan kenkawh a ni lo a ni.

"Penalty hamna chi a ni nge ni lo tih chungchangah te, referee-in thutlukan siam harsa a tihnaah te a rawn mai tur a ni a, chutiang chuan VAR hman dan tur mumal takin kan duang.

"Kha thil thlengah kha chuan VAR hman dan tur kan duan ang kha zawm a ni lo a, thuneihna hmansualna liau liau a ni VAR rawn inrawlh dan kha," tiin Webb chuan a sawi.