Emirates Stadium-ah Arsenal chuan Burnley an mikhual a, mual neitu lam hian 3-1 in hnehna an chang. He match-ah hian Fábio Vieira chu hnawhchhuah a ni a, a career-a red card a chawi vawi khatna a ni nghe nghe.
Goal hmasa ber hi 45+1 minute-a lut a ni a, mual veilam sir atangin Zinchenko chuan ball a vawrh, Saka chuan tauhin, hei hi goal bul atangin Trossard chuan a tauh goal. Goalkeeper nen an insu bawk a, Trossard hi a inti na teuh hle nghe nghe.
Minute 54-ah mikhual lamin an siphurh an rul. Mual dinglamah Koleosho chuan ball tha lutukin a tlanpui, a cross chu Rodriguez chuan lo khawih mah se, Saliba chuan a clear a, hetih lai hian a clear hla tawk lo. Hei hi Brownhill chuan a chhuih goal ta a ni.
Arsenal chuan an goal hnihna an khung chhunzawm nghal, minute 57-ah Trossard-a corner pet chu goal line bul atangin Saliba hian a tauh goal.
Minute 74-ah Zinchenko chuan Arsenal goal thumna a khung a, Arsenal corner pet chu O'Shea chuan an goal bar a tauh per, hemi per hi Zinchenko chuan a volley goal chhunzawm ta a ni.
Hun tawp dawn minute 7 a la awmin Fabio Vieira hnawhchhuah a ni a, chiang tak maiin Brownhill a tlawh, referee Michael Oliver chuan direct red card a pe ta a ni.
He match-ah hian goal mouth action a awm nual, Arsenal keeper Raya leh Burnley keeper Trafford te an che tha dun kher mai. Inkhelh tantirah box pawn atanga Brownhill shot tha zet chu Raya hian a lo dan sak a.
Saliba tihsual pawh Raya hian a lo dan sak, Saliba chuan lehlam pawl Gudmundsson-a tan through ball tha lutuk a pe, ani hian box chhung a thlenpui hnuin a shot a, Raya chuan a lo dan sak a ni.
Trafford pawh a che tha kher mai, Saka shot tha lutuk chu mak tak maiin a lo save hman. Box pawn atanga Trossard-a shot pawh a lo nam over a, Martinelli pawh box veilam sirah a dang bawk.
Declan Rice chuan box pawn atangin a chhuih goal teuh hle bawk. Arsenal hian shots vawi 16 lai an nei a, Burnley erawhin vawi 8 chauh an nei. Goal zawnah Arsenal hian vawi 6 an pet a, Burnley lamin vawi 5 an pet. Ball posessions hi Arsenal hian 64% an nei a ni.
Wolves lakah Tottenham an tlawm, hei vang hian Arsenal chuan Spurs an lehpel a, khelh 12 atangin Arsenal chuan point 27 neiin hmahruaitu Manchester City nen point 27 ve ve an nei. Mahse goal difference-ah City an tha zawk a, City hian game khatin an khel tlem zawk bawk.