Premier League inkhelah Manchester United chuan St. Mary’s Stadium-ah Southampton luhkhungin, hnehna an chang zo lova, team hnihte hi 2-2 in an inhnehtawk.
Goal li lutte hi first half-a lut vek an ni a, mual neitu Southampton hian 2-0 a hma an hruai hmasak zet hnuah United-in an si phurh pahnih an sut. Southampton tan Stuart Armstrong leh Cedric Soares-te chuan goal an khunga, United tan Romelu Lukaku leh Ander Herrera-te chuan goal an khung ve bawk.
United hian khelh 14-ah point 22 hlawhchhuak tawhin pasarihnaah an awm a, Southampton hian khelh 14-ah tho point kua hlawhchhuak tawhin 18-naah an awm thung. United hi an Premier League game hnuhnung pakuaah vawithum chiah hnehna changin, tunah hian hmahruaitu Manchester City aiin point 16 laiin an hnufual tawh a ni.
Southampton 2-2 Manchester United
(Armstrong 13’, Cedric 20’) (Lukaku 33’, Herrera 39’)
PLAYER RATINGS
Southampton: McCarthy 6, Valery 6, Yoshida 6, Vestergaard 5, Stephens 5, Cedric 6, Hojbjerg 6, Lemina 6, Armstrong 6, Redmond 6, Obafemi 6. Subs: Gabbiadini 6, Davis 6.
Manchester United: De Gea 6, Young 5, Jones 6, McTominay 5, Matic 5, Shaw 6, Fellaini 5, Herrera 6, Pogba 5, Lukaku 5, Rashford 6. Subs: Dalot 6, Martial 6, Lingard 6.
Match Report
Mourinho chuan a formation thlak kualin, 5-3-2 a hmanga, centre/defensive midfelder panga laiin inkhel bul an tana, McTominay, Matic, Fellaini, Herrera leh Pogba-te chu a tir atangin an lut veka, Matic leh McTominay-te chu Phil Jones-a bul centre back-ah an khel. United tan Rashford a khel tha hle a, United goal hnih thunah a inrawlh thuk dun hle bawk.
Inkhel tan a ni a, minute thum vel awrh khelh a nihin, Southampton goalkeeper McCarthy chuan ball a pet thelh a, a pawi thui teuh hle. McCarthy-a ball pet thelh hi Marcus Rashford chuan la in, Romelu Lukaku a pe a, Lukaku hian pet mahse McCarthy chuan a lo dang. Hemi hnu lawk hian Soton chuan United hi nawrin, Nathan Redmond chuan tha takin ball a khalha, Redmond hian Obafemi a pass-a , mahse Soton hian engah mah an chhuah lo.
13mins-ah mual neitu lam Soton-in goal an khunga, United box hmawrah chep tak taka in pass-in, box chhung dinglama awm; changtu neitu Armstrong chu ball pek a ni a, Armstrong hian petin, a goal mawi hle. 18mins-ah Rashford chu United box hma lawkah Lemina lakah foul-in, Soton-in free kick an hmu a, Soton tan full back Cedric chuan free-kick hi petin, De Gea chuan a ban phak lova, goal-ah a lut mawi hle. 20mins-ah Southampton chuan United lakah si hnih faiin hma an hruai.
United hian first half-ah an si phurh an sut ve ve a, darkar chanve khelh a nihin Lukaku chuan United tan goal a khunga, Pogba chuan tha em emin Rashford ball a pe a, Rashford hian khalhin, chep tak karah Lukaku chu through ball a pe a, chak taka rawn tlain Lukaku chuan ball hi a rawn chhuiha, a goal chiang hle. Minute ruk vel a ral lehin United tan Herrera chuan goal a khung ve leha, Rahsford bawk chuan tha takin ball a khalha, Soton box chhungah tlan puiin, goal zawn lamah ball a pe chhova, Herrera chuan mawi takin a lo kheng lut. First hi 2-2 a tihtawp a ni.
Second half tan a ni a, team hnihte an intum tawkin inkhel pawh a hmuhnawm thawkhat hle. Darkar khat khelh a nihin, McTominay chuan box chhungah Obafemi titlu in, Soton lamin penalty hmuh an inbeisei hle a, mahse referee-n penalty pekna tlakah a ngaih sak lo thung. Hemi hnu deuh lawk hian Matic chuan Soton box chhungah ball a cross luta, Pogba chuan lo back volley mahse, Soton keeper McCarthy a ti buai lo. 70mins-ah Southampton player hlui Luke Shaw chu a inhliama, lakchhuah niin, Diogo Dalot chu Shaw aia luh tir a ni. Shaw lakchhuah a nih hnu lawk hian, Ashley Young chuan mual veilamah ball khalhin, Soton box chhugah a khalh luta, lei hrulah ball cross-in McCarthy chuan thildang a thlen hmain a lo man. Soton-in nawr let ve leh nghalin, mual dingalamah Redmond chuan ball a khalha, ani pawh hian lei hrulah tho ball cross cross phei mahse tumah lo khawih tur an awm lo.
77mins-ah Mourinho chuan player khel tha tak Rashford lachhuakin Anthony Martial a dah luta, United supporter lam an lungawi lo hle. Martial dah luh hnu rei loteah a vawihnih nan Pogba chuan ball la sualin, Lemina chuan ball hi a la a, Redmond pe in, Redmond hian hla tak atangin United goal-ah a pet a, De Gea chuan a lo nam chhuak hram. First half-ah pawh Pogba hian ball a la sual tawh a, a pawi thui lo hlauh. Pogba hi khel chhe hran lo mahse, tihsual a ngah angreng hle a, a pawi thui vak lo thin erawh a vannei hle. Team hnihte an innawr tawnin, chak an tum dun hle a half chance pawh an insiam nual. Mahse, second half-ah goal khung belh thei an awm lova, inkhel hi 2-2 in a tawp a ni.