11 Feb 2019 02:20

inkhel

​Khual mualah Ronaldo-a hovin Juve an chak nuamsa

Serie A inkhelah champion lai leh hmahruaitu ni bawk Juventus chuan Sassuolo chu Stadio Citta del Tricolore-ah an lukhunga, mikhual lam Juve hi si thum faiin an chak.

Juve tan hian German midfielder Sami Khedira, Portugal captain Cristiano Ronaldo leh German midfielder dang Emre Can-te chuan goal an khunga, point thum hlawhchhuakin, an dinhmun an sawhnghet.

Juve hian khelh 23-ah point 63 lai an hlawhchhuak tawh a, hmahruaitu ni chhunzawm zelin, anmahni hnaih bertu Napoli aiin point 11-in an fal tawh. Sassuolo hian khelh 23-ah point 30 hlawhchhuak tawhin tunah hian 11-naah an awm mek a ni.

Sassuolo 0-3 Juventus

(Khedira 23’, Ronaldo 70’, Can 86’)

Sassuolo- Consigli, Lirola, Magnani, Peluso, Rogerio, Bourabia, Sensi, Loatelli, Berardi, Djuricic, Babacar.

Juventus- Szczesny,De Sciglio,Rugani, Caceres, Sandro, Bernardeschi, Khedira, Pjanic, Matuidi, Ronaldo, Mandzukic.

Match Report

Sassuolo hian 4-3-3 formation an hmanga, hmatawngah Babacar chuan hma hruaiin Berardi leh Djuricic-te chuan a sirah an thlawp. Max Allegri chuan Juventus hi 4-4-2 formation-in a rem a, hmatawngah Ronaldo leh Croatian forward Mario Mandzukic-te an inkawp.

Sassuolo hian inkhel bul an tan tha a, Djuricic chuan chance tha em em nei nghal mahse Juve keeper Wojciech Szczesny chuan Juve goal chhuah nghal tur a veng.Hemi bakah hian Manuel Locatelli-a shot tha tak chu Polish goalkeeper hian a lo save bawka, goal ban a per nghe nghe. Minute sawmhnih chuang hret khelh a nihin, Sassuolo goalkeeper Andrea Consigli chuan ball a pet chhuak chhe hle a, hei hi Juve lamin goal-ah an chantir zui. Consigli hian ball a pet chhuak chhe hle a, hemi hi Ronaldo chuan lo la in, kawh takin Sassuolo goal-ah a pet a, hei hi dan lo niin, a sawhkhawk chu Khedira chuan goal-ah a lo khung zui. Ronaldo hian Sassuolo goal-ah khung mahse a offside avangin goal a pawm a ni lova, Szczesny tihsual chu Berardi chuan goal-ah a chantir teuh hle bawk.

70mins-ah Ronaldo chuan Juve goal hnihna a khunga, 6yards vel atangin ball chu Sassuolo goal-ah tauh lutin tun Serie A season kal mekah a goal 18-na a khung.Inelna hrang hrangah Ronaldo hian a zawnin season 13 chhung gol 20 chin emaw a aia tam a la khung ziah a ni. Hun tawp hma lawkin bench atanga rawn lut Can chuan City goal thumna a khung leh bawka, champion lai Juve hi si thum faiin an chak ta a ni. Juventus hi a zawnin Serie A-ah vawi sarih an champion mek a, a vawi riat nan champion tum mekin, an hlawhtlin a rinawm viau a ni.