Nemanja Matic chuan Pathiannia Everton laka 0-4 ngawta an tlawm chhan bulpui pakhat chu khelmual chhungah kaihruaitu an neih loh vang niin a sawi.

Pathianni khan Goodison Park-ah Manchester United chuan Everton an luhchilh a, Premier League game pawimawh tak maiah hian United chu an tlawm chiang hle a, away-ah a zawna vawi nga an tlawmna niin, March 1981 hnua an chet chhiat ber tum an tawng a ni.

Tun hnaia Ole Gunnar Solskjaer leh a pawlte’n match 8 an khelhah vawi 6 chu an chak lo tawh a, Goodison Park-a an inkhelh hnuah Nemanja Matic chuan a ngaihdan hi a sawi chhuak a ni.

Matic chuan, “Harsatna chi hrang hrang kan neih rualin, tuna kan harsatna lian ber chu khelmual chhungah team kaihruai theitu tur tha tak kan nei lo hi a ni,” a ti.

Kum 30-a upa Matic chuan, “Everton nen kan inkhelh kha chuan dem ber tur chu ka niin ka hria a. Kan team-ah chuan tawn hriat ngah ber pawl ka ni a, kum lamah pawh a upa pawl ka ni ve tawh bawk a. Mual laiah kan team chu a che tha zawk kan nih loh tlat chuan team tan chet fuh ngaihna a awm lo,” a ti bawk.

A sawi zelnaah, “Kil hrang hrang atanga thlir hnuah dem tur an awm a nih chuan keimah hi min dem vek se a dik berin ka hria a. Kei aia tawn hriat ngah an awm vak bik loh avangin ka mawhphurhna a sang hle a, hei vang hian eng dang mah puh chi niin ka ngai lo,” a ti.

Manchester United chu Premier League season kal mekah paruknaah an la awm a, palinaa awm Arsenal aiin point 2 in an hniam zawk a. Nilai zan hian Old Trafford-ah Manchester City an mikhual ang a, Manchester Derby-ah hian chak ngei an tum dawn a ni.

An thenawm club Manchester City hi Premier League hmahruaitu Liverpool aiin point 2 in an la hniam rih a, City hian game khatin an khel tlem zawk thung a. Manchester United hi Nilai zana an hneh thei a nih chuan Premier League hmahruaitu an ni leh thei dawn a ni.

United chuan Premier League season kal mekah Chelsea, Huddersfield leh Cardiff te chu an la hmachhawn dawn a, season tharah UEFA Champions League khelh theih ngei an tum mek a ni.