Ni 19,2020 (Pathianni) chawhnu dar 2:00 khan Khawzawl District Football Association hawnna inkhawm neih a ni a, he hun hi MFA hruaitute leh Champhai District Football Association hruaitu ten an hmanpui a ni. Khawzawl District Football Association hawnna inkhawm Zuchhip YMA hall-a neih hi MFA Joint Secretary Pu C Vanlalmawia'n a kaihruai a. Champhai DFA President Pu Hualrikhuma chuan thu sawiin, Khawzawl District Football Association a ding ta chu CDFA ten kan lawmpui rualin a lunglen thlak dawn hle a ni," a ti.
Khawzawl DFA thar chu rilru tha pu chunga bul tan tura chahin, DFA thar a pian ruala grass phah field tha tak an nei tur chu a lawmpui thu a sawi bawk a ni. CDFA President chuan, khawvela infiamna ropui ber chu football a nih angin, DFA thar hruaipuite pawh infiamna ropui ber hruaitute in nih avangin chona lian tak a nih a ti a, football-ah rilru leh nghaihtuahnate nasa leh zuala hmang tur leh Office Bearers-te pawh inkawm ngeih turin a chah a ni. Social media-te hmang tangkai tura a chah rualin tawngkam erawh fimkhur thaka hmang turin a chah a, sawiselna nasa tak an la hmachawm dawn a, chung hunah pawh chuan dawh theih taka ngawih chhuh thin turin a chah bawk.
Hemi hnu hian Pu Lalnunmawia, MFA Patron chuan Khawzawl District Football Association chu duhsakna sang tak hlan chungin lawm takin a hawng a, hruaitu lailawk turte pawh a puang nghal a ni.
Khawzawl District Football Association hruaitu atana ruat lailawk te:
President : Pu Joseph Zonunmawia,
Sr Vice President Pu Lalnunenga,
Vice President : R.Lalkhawngaiha,
Hony Vice President : Pu V.Malsawmtluanga, Tv K.Lalhmangaihzuava.
Hony Secretary : Pu Joseph Vanlalnghaka,
Asst Secretary : Tochhong Lalremruata leh B.Lalhmangaihtluanga,
Joint Secretary : Tv Lawmsangzuala,
Treasurer : Pu Rohmingthanga,
Fin Secretary : Tv Lalngaihawma.
Hruaitu lailawkte hian kum 2021 May thla thleng DFA hi an hruai dawn a ni. Khawzawl DFA hawnna inkhawmah hian Khawzawl DFA President thar Pu Joseph Zonunmawia pawhin thu sawiin, Khawzawl District Football Association hawn a ni ta chu lawmawm a tih rualin CDFA atanga indan a ngai ta chu lunglen thlak a tih thu a sawi a, CDFA-in kal phung tha tak tak an lo neih tawhte pawh chhawm chhoh ve zel a, DFA puitling tak chhuaha hma lak zel an tum thu a sawi bawk a ni. He inkhawmah hian MFA chuan CDFA leh Khawzawl DFA hnenah thilpek hlain CDFA hnenah cheng 20000 an hlan a, Khawzawl DFA hnenah hian cheng 20000 leh football panga an hlan a ni.
(adsbygoogle = window.adsbygoogle || []).push({});