​Khawvelin FIFA ring ngam tawh lo ?

28th May 2015, 12:05AM

A buai nuai mai, a tu ber nge thiam lo tih tun din hmunah chuan kan hre thei lo. FIFA President thlan a nih hma chiaha eirukna thubuai vanga FIFA Official 7 ngawt Zurich-a man a ni hian FIFA tawp zia a tarlang chiang hle a, hemite hian thil an tisual tak tak nge Sepp Blatter-a lampawl puhna vang zawk tih chu khawvelin a thlir mek.

Zirtawpni hian FIFA president thlan a ni dawn, chumi tur chuan Zurich an pan khawm a. Blatter khing tur hian hming ziaklut awm ve hlawm mahse Luis Figo leh Michael Van Praag te an inhnukdawk ta si a, Jordan Prince Ali Bin Al Hussein chiah Sepp Blatter hmachhawn tur a awm ta. Inthlan hma ni hnih lek la awmin FIFA Official paruk te chu Swiss Police ten Zurich Hotel Baur au Lac atangin an man a, $150m chuang thamna laa puh an ni.

Heng an mi man zingah hian Vice President Jeffrey Webb pawh a tel ve a, ani bakah Eduardo Li (Costa Rica), Eugenio Figueredo (Uruguay) leh Brazilian deputy FA chief - Jose Maria Marin-te pawh an tel bawk a ni. FIFA President ni mek Sepp Blatter erawh man zingah a tel ve lo hlauh. Heng an mi mante hi thamna la tak tak an ni nge ? Thamna laa puh an ni zawk ? Sepp Blatter-a lam tang an ni nge ? Sepp Blatter paihthlak duhtute zawk ? Engmah khawvelin a hre chiang lo. Kan hriat chian theih chhun chu FIFA pawl zahawm tak hi eirukna vangin pawl tenawm tak a ni mek tih hi a ni.

Heng an mante hi eng thubuai chiaha man nge tih la chiang lo mahse tunhma kum 20 chuang liamta atanga sum thianghlim lo dawn chung chang nia rin a ni a. Tin, Tournament hrang hranga Media leh Marketing rights FIFA in an lak kawnga hlemhletna te, FIFA World Cup thlen dilte atanga thamna te leh sumdawng company lian tak takte nena an indawrna chungchanga sum thianghlim lo dawn vangte nia rin a ni.

FIFA Viice-President lo ni tawh Trinidad and Tobago mi Warner pawh thamna laa puh a lo ni tawh bawk a. Kum 72 mi hian 2011 khan FIFA chu a lo bansan tawh a nih kha. 2018 leh 2022 World Cup thleng tur vote thlaka an zawnnaah pawh thamna tenawm tak inrawlh nia hriat a ni a.

FIFA chuan hemi chungchang hi chhui turin, US Prosecutor Michael Garcia chuan a theih tawpa a chhui hnuah a hmuhchhuahte chu FIFA-ah a thehlut a, mahse hei pawh hi FIFA-in mualpho an hlauh vang nge nasa taka ti danglamin media hmaah engmah thil diklo a awm loh thu an sawi chhuak a nih kha.

Khami tum khan Michael Garcia khan a report chu nasa taka tih danglam a nih thu thinrim taka sawi chhuakin FIFA chhuina kawngah a ban thu a sawichhuak chhunzawm bawk a nih kha. FIFA chhungkuaah hian eirukna liantham tak a awm reng tih a lang chiang zual zel a.

European Football thuneitu UEFA phei chu FIFA atanga inputchhuah hial hman atangin an lo chak tawh. FA leh Europe Football thuneitu tam tak ten Blatter thlak an rawt a, 2011 khan Blatter chuan President chuh a tum tawh loh thu a sawi zet a, tunah erawh term 5-na chelh rinkai ber a ni leh ta mek zel.

Copyright © inkhel.com 2024. All rights reserved.