09 Jul 2015 06:32

Asanga Tlau

Khawvelin boxer a hriat lar te

Professional boxer ropui tak tak khawvelin in a lo hmelhriat tawha, tarlan sen vek a ni dawn lova, chung zinga lar zual leh mite ngaihven hlawh zual te lo tarlang dawn teh ang.

Muhammad Ali
January 17, 1942 a piang American boxer Cassius Marcellus Clay Jr., Muhammad Ali tia khawvelin a hriat lar tak hi heavyweight boxer ropui bera chhaltu an tam hle a, kum 100 liamta chhunga sportsman hriat hlawh leh lar ber te zinga mi niin Sports Illustrated chuan "Sports Personality of the Century" chawimawina a lo hlan tawha, BBC pawhin "Sports Personality of the Century" atan a lo puang ve tawh bawk.

Kum 12 mi a nihin boxing ah training a tana, kum 22 leka upa a nih kum 1964 khan world heavyweight championship chu Sonny Liston atangin a chhuhsak nghal. Kum 1975 khan Sunni Islam ah inletin a hming pawh a thlak nghal bawk.

Kum 1967 khan Vietnam War a kal tur US military chu a sakhua Islam zirtirna nen a inmil lo tiin a zawm duh lova, a chetna avang chuan harsatna tawk chho nghalin a title pawh hlihsak a ni a, kum li dawn boxing chawlh lailawk tir a nih hnu 1971 khan US Supreme Court chuan an hremna chu a hlihsak ve leh ta a ni.

"The Greatest" tia an koh Ali hi a lineal World Heavyweight Champion vawi thum ni thei awmchhun a la ni ta renga, 1964, 1974, leh 1978 te khan he title hi a lo la tawh a ni.

Floyd Joy Mayweather, Jr


Pound for pound boxer khawvelin a hmuh tawha hlawhtling ber Mayweather hi February 24, 1977 khan a lo pianga, ani pawh hi American boxer tho niin tunlai boxing khawvela boxer lar ber pakhat a ni mek. Division hrang hrang panga a world champion ni thei a ni hian boxer ropui a nihzia a tarlang chiang hle awm e.

World title tum 11 lai a la tawha, 1998 leh 2007 ah te khan Ring magazine chuan Fighter of the Year ah lo thlangin Boxing Writers Association of America (BWAA) Fighter of the Year award 2007 leh 2013 ah te hlan a lo ni tawh bawk.

2012 leh 2013 ah te Forbes leh Sports Illustrated chuan athlete hausa berah a puanga, 2014 Forbes rich list ah topper nihna a hauh leh bawk. July ni 6, 2015 mai khan WBO a pawisa a chhun luh tura bituk zat a chhun luh loh avangin Pacquiao laka a welterweight title lak chu hiihsak a lo ni tawh a ni.

Manny Pacquiao


December 17, 1978 khan Filipino boxer ropui leh lar Emmanuel "Manny" Dapidran Pacquiao hi a lo pianga, basketball, lemchan leh zai lamah te pawh inhmang viauin kum 32 mi a nih khan Philippine House of Representatives ah te hial thlan tlin a lo ni tawh a ni.

Division hrang pariata champion thei hmasa ber leh awmchhun a ni a, world title vawi sawm lai a la tawh bawk. Boxing Writers Association of America (BWAA), World Boxing Council (WBC) leh World Boxing Organization (WBO) te chuan 2000-10, kum sawm liamta chhunga fighter of the decade ah an thlanga, 2006, 2008, leh 2009 ah te The Ring leh BWAA chuan "Fighter of the Year" ah an lo thlang tawh bawk.

Manny Pacquiao hi Christian tha tak a ni a, nun tlawm tak a neihna hian mi te thinlung a hnehin supporter pawh a ngah phah hle a, keini Mizo te ah pawh a tla na hle a nih hi. Tanpui ngaite tanpuina kawngah a thawhhhlawk thin hle bawk.

Mike Tyson


American professional boxer chawl ta Mike Tyson hi June 30, 1966 khan lo piangin khawvelin heavyweight boxer a hmuh ropui berte zinga chhiar tlak khawpa boxer tha a ni a, WBC, WBA leh IBF heavyweight titles te kum 20, thla 4 leh ni 22 chauha upa a nihin a la tawha, heng title la thei naupang ber record chelhtu a la ni mek a ni.

Ring pawn leh chhunga a chet dan a mawi loh thin vangin a chanchin in mi tam zawk beng a verh thei hle a, "The Baddest Man on the Planet", "Kid Dynamite" leh "Iron Mike" ti te in an koh phah hial reng a ni. Heavyweight boxer hnek na a sawi a ni thin a, ESPN chuan "The hardest hitters in heavyweight history" list a siamna ah 1-na dinhmun a luah tir nghe nghe.

November 1996 khan Evander Holyfield lakah a WBO title a chan a, 1997 a rematch an neihna ah Tyson hian Holyfield a beng a seh sak a, disqualified a ni nghal nghe nghe a nih kha. Tyson hi a che rawva ve thei hrim hrima, kum 1991 khan Desiree Washington a pawngsual avangin kum ruk chhung lung in tang tura tih lo ni tawhin kum thum a tan zet hnuah an chhuah zalen leh thei hlauh.

2006 a boxing a chawlhsan hma, pro-boxing a a hun tawp lam khan a talbuai chho hle a, sum lamah harsatna nasa tak tawkin $300m zet a boxing career hun chhunga hlawh thei si kha 2003 khan leiba rul thei lova puan a ni a, June 3, 2005 a Tyson-a interview USA Today in a tichhuahah Tyson chuan a nun hman dan zawngte zawngte chu a lo thlawn mai a nih thu te, a zah thu te a sawi ve bawk a ni.

Tarlan phu dangte:
Sugar Ray Robinson
Joe Louis
Evander Holyfield
Oscar De La Hoya
Lennox Lewis