Manchester City leh Germany midfielder Ilkay Gundogan chuan Barcelona captain Lionel Messi chu khawvela footballer tha ber a nih thu a sawi ve leh ta.

Cristiano Ronaldo nge Messi chu khawvela footballer tha ber ni zawk tih inhnialna hian kum tam tak chhung football khawvel a chenchilh tawha, mi tam takin Messi hi player tha bera an ngaih laiin mi tam takin Ronaldo hi player tha berah an ngai ve tho bawk.

Inhnialna tawp ngai lo tur a ni a, mimal ngaihdan erawh mi tinin kan nei theuha, Gundogan pawhin Ronaldo aiin Messi a dah sang zawk tih a sawi.

Gundogan chuan, “Lionel Messi hi khawvela footballer tha ber a ni a, ka hmuhdan chuan thiamna bik a nei a ni. Talent a nei tha em em a, chu chu khelmual chhungah hian a lan tir lo ngai lova, a hun takah thutlukna diktak a siam ziah a ni.

“Messi hi chuan a speed hi a hmangtangkai thiam em em a, a finishing a tha in Messi anga quality sang hi tu mah dang an awm lo. Kan generation-ah chuan a ber a ni a, football chanchina ropui ber a ni bawka, a inkhel hi kum eng emaw zah chhung kan la hmuh theih ka beisei a ni” a ti.