21 Feb 2020 03:49

inkhel

Khawvela tha ber ka ni: Joel Embiid

Joel Embiid chuan 112-104 a Brooklyn Nets an hnehin Philadelphia 76ers tan point 39 a score bakah rebound 16 a la a, hemi hnuah hian khawvela player tha ber a nih thu a sawi.

Embiid chuan, “All-Star Game kha a nuam ka ti a, ka tel thei kha lawmawm ka ti hle bawk a. Chutih rualin, All-Star Game mai ni loin, helai hmunah hian inkhelh apiangin khawvela player tha ber ka nih vangin tha taka chet zel ka tum dawn a, a tam thei ang ber chak turin theihtawp ka chhuah zel ang,” a ti.

“Chicago khawpuia All-Star Game kan khelh kha chuan theihtawp ka chhuah chiah lo a, Brooklyn nen kan inkhelh kha chuan a dan a dang tawh viau thung a, theihtawpin ka tang ve thung a ni,” a ti bawk.

A sawi zelnaah, “Tang taka khelh kha ka duh dan a ni a, inthlahdah hauh lo turin theihtawp ka chhuah ngar ngar a. Offensive foul ka nei nual a, khatiang hun a inher chhuak kha pawi ka ti hran lo a, ka tang a ni tih a lang chiang lehzual a ni mai,” a ti.

Tobias Harris chuan point 22 a thun ve bakah rebound 12 a la a, assist 6 a nei bawk a, an lak thar Alec Burks pawhin Philadelphia tan hian point 19 a score a, overtime-ah 76ers tan point 9 ngawt a score a ni.

Khawvela player tha ber a nih thu a sawi hnuah Embiid chuan Sixers chu Wisconsin khawpuiah Milwaukee Bucks hmaah a dinpui leh dawn a. Giannis Antetokounmpo te nen chak zawk nih an inchuh dawn a, Embiid chuan chak ngei an tum tur thu a sawi chhuak.

“Bucks hi kan hneh theih ngei ka ring a, chutiang result neih chu kan tum dawn a. A hma deuhin chiang takin kan hneh a, kan inkhelh hnuhnun berin an chak ve thung a, hei vang hian kan inhmachhawn leh hunah chuan kan chak a tul a ni,” tiin Embiid chuan a sawi.