11 Jan 2019 06:55

inkhel

Khawvela stadium lian pathumna Camp Nou

Barcelona khelmual Camp Nou chu Europe khawmualpuia football stadium zinga lian ber a ni a, khawvel pumah chuan stadium len lamah pathumna a ni.

1957 khan Camp Nou hi an peih fel a, FC Barcelona chuan a chhunga mi 99,354 zet lenna stadium hi an khelmual atan an hmang chho ngar ngar a. UEFA chuan Camp Nou hi rating an pe sang hle a, stadium that vang leh an enkawl that avangin UEFA hian five-star rating an pe a ni.

He khelmualah hian La Liga champion Barcelona te inkhel chauh lo pawh inkhel dangte an buatsaih ve fo thin a. Nikumah khan helai bawr vela politics boruak fuh loh vangin Barcelona leh Las Palmas te chu entu awm loin Camp Nou-ah hian an inkhel a, hetiang hi thil thleng khat tak a ni.

1980 khan Camp Nou chu an siam danglam a, 1982 FIFA World Cup atan he stadium hi an buatsaih a. Hemi kuma World Cup match tam zawk chu Camp Nou-ah hian an khel a, hemi atan hian VIP lounge thar, box, press area, marker leh thutna thar an siam a. Hetianga an siam danglam hian mi 22,150 zet chu a chhungah hian an awm belh theih phah a ni.

1980 hnuah chuan Camp Nou hi an khawih danglam leh ta meuh lo a, heti chung hian 1989 leh 1999 te khan European Cup/Champions League final te chu he stadium-ah hian an nghat tho a. Hei bakah hian UEFA Cup Winners’ Cup final vawi hnih, Inter-Cities Fairs Cup final vawi li, UEFA Super Cup final vawi nga, Copa del Rey final vawi li, Copa de la Liga final vawi hnih, Supercopa de Espa final vawi sawmhnih pakhat, 1982 FIFA World Cup game nga, 1992 Summer Olympics football final te chu Camp Nou-ah hian an nghat bawk a. 1964 European Nations’ Cup football match li pawh he khelmualah hian an khel bawk a ni.

1988-89 khan UEFA chuan Camp Nou that leh changkan bakah a enkawlna kawngah an tih that em avangin five-star rating an pe a. 1984 khan a chhungah hian museum an siam tan a, hetah hian thil hlui hlu tak tak an dah hnem tawh hle a. He museum hi Catalonia-ah chuan museum tlawh nasat ber dawttu a ni hial a. FC Barcelona Museum hi kum tinin mi maktaduai 1.2 velin an tlawh ziah a ni.

Stadium chhungah hian Barcelona kaihhnawih thil hlui zawrhna hmun te, training match neihna hmun te leh player te tan chapel te pawh a awm bawk a. 2000 kum khan stadium hming thlak tumin hma an la a, mahse fan 29,102 te chuan a hming thar tura an ruahman Estadi del FC Barcelona tih chu an hnawl a, a hming pangngai Camp Nou chu pu chhunzawm turin vote an thlak a ni.