12 Jun 2019 07:38

inkhel

Khawvela mi hlim ber ka ni: Luka Jovic

Luka Jovic chuan medical a pal tlang a, Real Madrid chu a zawm chiang ta a. Santiago Bernabeu lama a kal theih tak avangin khawvela mi hlim ber a nih thu a sawi chhuak.

Serbia striker Luka Jovic hi Real Madrid chuan Bundesliga club Eintracht Frankfurt atangin €60 million ($68 million/£53 million) in an lei a. Santiago Bernabeu-ah kum ruk chhung awm thei turin thuthlung an ziahpui a ni.

Jovic hian Eintracht Frankfurt chu Europa League semi final a luhpui thei a, hetiang thleng an kal theihnaah hian goal 10 chu a thun nghe nghe a. Semi final-ah Chelsea nen an inhmachhawn a, Frankfurt hi penalty-ah an chak ta lo a. Bundesliga season hman zawh takah pawh Jovic hian goal 17 chu a thun bawk a ni.

Medical a pal tlang hnuah Real Madrid chuan Luka Jovic hi an la lut zui nghal a, mipui hmaa an pho lan hnuah theihtawp chhuah a tum thu sawiin, a hlim zia hi a sawi nasa hle.

“Real Madrid anga khawvela club lian berte zinga mi ka zawm thei hi lawmawm ka ti em em mai a, khawvela mi hlim ber ka ni,” tiin Jovic chuan a sawi.

“Ka phur em em mai a, thutlukna dik tak ka siam niin ka hria a. He club tan hian theihtawp ka chhuah ang a, Real Madrid chu trophy leh title tam tak lakpui ka tum dawn a ni,” a ti bawk.

President Florentino Perez chuan Los Blancos chu season hman zawh takah khan an che tha lo hle tih a pawm thu sawiin, Luka Jovic chuan an club chu dinhmun duhawm takah a dintir leh theih a beisei thu a sawi.

Florentino Perez chuan, “Vawiinah hian Madridistas zawng zawng hmaah ruahmanna thar kan kalpui tan mek a ni tih ka puang duh a. Theihtawp kan chhuah ang a, rim taka hna thawk chungin kan club tantu mi maktaduai chuang zette nen kan duhthusam rama awm theih kan tum dawn a ni,” a ti.

“Luka hi Real Madrid player a ni ta a, European Cup 13 ngawt nei thei club kan ni a. Kan player a ni thei hi a lawmawm em em mai a, khawvela striker tha berte zinga awm zel thei tura kan club a thlang hi thil lawmawm tak a ni,” a ti bawk.