Khawvela infiammi ropui ber Lionel Messi

25th April 2019, 11:04PM

Lionel Messi chu tun hnaiah khan khawvela footballer awm tawh mai ni lo, khawvela infiammi awm tawh zawng zawng zinga ropui berah an thlang.

Infiamna lampang website pakhat GiveMeSport chuan tun hnaiah khan an website tlawh thinte ngaihdan an la a. Khawvel awm tirh atanga tun thlenga infiammi piang chhuak zinga ropui bera an hriat thlang turin an ti a, hetah hian Lionel Messi chu a chungnung ber a ni.

Barcelona leh Argentina thiampuipa Lionel Messi hi boxer ropui Muhammad Ali, tennis ace Roger Federer, golf sawi tawha a hming lang lo thei lo Tiger Woods te leh Juventus leh Portugal superstar Cristiano Ronaldo te ai pawhin an dah sang zawk a ni.

GiveMeSport in ngaihdan an lak hi tournament kalphung angin an kalpui a, group stage leh knockout stage te a awm ve thlap a. Infiamna kawng hrang hranga infiammi chi hrang hrangte chu group 4 ah an dah hlawm a, infiammi hi 16 an thlang chhuak a, group khatah mi pali theuh an dah a ni.

Group tina sang berte hi semi final-ah an chho a, chuta chungnung pahnihte chu final-ah an ineltir leh a. Final-ah hian vote hmangin duh an thlang leh a, heta vote hmu sang zawk hi pakhatna a ni.

Group One-ah chuan Lewis Hamilton, Roger Federer, Floyd Mayweather leh Serena Williams te an awm a ni.

Group Two-ah chuan Phil Taylor, Michael Phelps, Tom Brady leh Lionel Messi te an awm a ni.

Group Three-ah chuan Tiger Woods, Cristiano Ronaldo, Martina Navratilova leh Michael Jordan te an awm a ni.

Group Four-ah chuan LeBron James, Michael Schumacher, Pele leh Muhammad Ali te an awm a ni.

Lionel Messi chuan semi final-ah Serena Williams, Pele leh Michael Jordan te chu elpui tur a la nei a. Lehlamah Cristiano Ronaldo chu Muhammad Ali, Michael Phelps leh Roger Federer te nen an awm bawk a. A tawpah chuan Lionel Messi leh Muhammad Ali te chuan final hi an lut a ni.

Final-ah chuan vote an thlak leh a, Lionel Messi leh Muhammad Ali te hi an inthlau lo hle a, a tawpah chuan Facebook kaltlanga vote 2,40,800 zet tla atangin Messi chuan vote tla zawng zawng atangin 51% a hui a, pakhatna hi a ni ta a ni.

A hma deuhin Twitter lamah hetianga infiammi ropui ber hi an lo thlang tawh bawk a, Messi chuan final-ah vote 53% a hmu a, pakhatna a lo ni tawh bawk a ni.

Copyright © inkhel.com 2024. All rights reserved.