Khawvela goalkeeper tha ber pawl ka ni: Thibaut Courtois

15th November 2019, 10:11PM

Thibaut Courtois chuan tun season-ah sawisel hlawh chho viau mah se khawvela goalkeeper tha ber pawl a nih thu a sawi.

Belgium goalkeeper Thibaut Courtois hi UEFA Champions League-a Real Madrid leh Paris Saint-Germain inkhelh tumin a che fuh vak lo a, an sawisel nasa hle a. Hemi hnuah hian Club Brugge nen an inkhelhin first half chhungin goal hnih a chhuah hman a, half time laiin an thlak phah bawk a ni.

Tun hnaiah a chet that loh avanga sawisel a hlawh chhoh hnu pawhin khawvela tha berte zinga a tel thu a la sawi chhuak a ni.

Courtois chuan, “Ka thiamna leh ka theihna te ngaihtuah hi chuan khawvela goalkeeper tha berte zingah hian ka tel thei chiang a ni,” tiin a sawi.

“Ka thiam em avang leh ka that em avangin mi hian min sawisel nasat phah a. La Liga-ah pawh tun thlengin goal 7 chauh ka la chhuah a, chutianga che chhia tia sawi tur ka la ni lo hrim hrim,” a ti bawk.

Club Brugge nen an inkhelh tuma a goal chhuah chungchang kha sawiin, Courtois chuan, “Kha inkhela goal hnih ka chhuahte kha keima thiamloh vang a ni hran lo a, goal mak danglam tak pahnih an ni a tih theih a. Half time laia min thlak chhan kha chu ka dam chiah loh vang zawk a ni,” a ti.

“Chanchinbu te kha ka chhiar zui lem lo a, engtin nge an sawi ka hre zui vak lo a. Professional nih chuan coach bakah kan teammate te thil sawi bak kan ngaihven vak lo a, anni ho thil sawi aia pawimawh hi a awm lo a. Goalkeeper nihna hre chiangtu thusawi hi a pawimawh dang la awm leh thei chu a ni,” tiin Courtois chuan a sawi a ni.

A sawi zelnaah, “Goal chhuah avanga mi sawisel hi chu thil harsa lo tak mai a ni a. Hetiang hian min tibuai hran lo a, training naah theihtawp ka chhuah a, tha taka ka mawhphurhna hlen ka tum mai thin a. Ka thiamna hi ka ringhlel ngai lo a, mahni inrintawkna ka neih hi ka hloh a nih chuan ka tihsual lian ber a ni ang,” a ti.

Copyright © inkhel.com 2024. All rights reserved.