Alisson chu khawvela goalkeeper tha ber atan an thlang a, tun hnaia Goal 50 an thlan chhuah zinga goalkeeper awm chhun niin, a tha berah hian thlan a ni ta a ni.

Goal.com chuan 2018-19 season chhunga khawvel hmun hrang hranga footballer mipa leh hmeichhe zinga a tha zual an thlang chhuak a. Mipa tha zual 25 leh hmeichhe tha zual 25 an thlang chhuak a, hengah hian Alisson chauh hi goalkeeper zingah chuan a tel phak a ni a, goalkeeper zingah chuan a tha ber a tih loh theih loh a ni.

Thla 12 kalta chhung khan Manchester City goalkeeper Ederson chuan Alisson Becker ai chuan trophy a la hnem zawk daih a, Pep Guardiola pawlte chu 2018-19 season chhungin title pathum a lakpui bakah, tun season tirah khan Community Shield-ah pawh Liverpool chu penalty shootout-ah an hneh leh bawk a. Chuti chung chuan Goal 50 ah hian Ederson chu a lang lo a, Alisson chu a lang zawk ta tho a ni.

July 2018 ah khan Alisson hian Roma atangin Liverpool chu £66.8 million ($82.5 million) in a zawm a, Liverpool tlar hnung lam an tiphui tha thei hle a, Premier League club zingah chuan goal chhuah tlem pawl tak an ni chho thei a ni.

Season liam taah khan Premier League title an la teuh hle a, Manchester City chu point 1 in an pha ta lo a. Hetih lai hian UEFA Champions League final-ah Tottenham Hotspur chu 2-0 in an hneh a, Madrid khawpuia Wanda Metropolitano-ah Alisson chu a che tha hle.

Internacional academy atanga chawr chhuak Alisson hi an ram Brazil lamah a kir leh phawt a, Selecao chu Copa America title a lakpui a, vawi 6 khelhah goal 1 chiah a chhuah a ni.

Kumina Goal 50 ah hian Alisson chu a langsar pawl a ni a, Liverpool lama a khelhpui Virgil van Dijk, Sadio Mane leh Mohamed Salah te bakah superstar pahnih Cristiano Ronaldo leh Lionel Messi te nen an langho a ni.

2019 ah hian a vawi khatna atan mipa leh hmeichhia 25 ve ve hi an thlang chhuak a, Top 25 ranking hi November 12 hian an puangzar dawn chiah a ni.