Manchester United chuan an goalkeeper David De Gea chu contract thar chungchangah an hmin thei ta a, De Gea hi hun rei zawk atan United chuan an thlung nghet.

Spanish goalkeeper De Gea hian kum 2023 thleng daih contract thar a ziaka, United lam hian an duh chuan kum khat dangin an first choice goalkeeper contract thar hi an pawhsei belh thei bawk dawn.

Kum 28 mi De Gea hian kum 2011 khan Atletico Madrid atangin United hi a zawma, Old Trafford-ah a awm chhung hian Premier League title pakhat bakah FA Cup, League Cup leh Europa League-te vawi khat theuh a chawi tawh.

De Gae hian a contract tharah hian a hlawh hnem hle a, kar khat chhungin pound 350,000 atanga pound 375,000 inkar zet a hlawh niin sawi a ni a, Sky Sports chuan De Gea hi khawvela goalkeeper hlawh hnem ber a nih thu a tarlang nghe nghe.

Contract thar a ziah chungchang sawiin De Gea chuan, “He club ropui taka kum riat hun ka hmang thei hi a hlu ka ti a, Manchester United-a ka career ka chhunzawm zel thei tur hi thinlung takin ka lawm takzet a ni. He hmuna ka lo luh tirh khan he club tan hian game 350 chuang ka khel ang tih hi ka ring pha ngai lova, tunah chuan ka hmalam hun a chiang tawh bawk nen he club hi trophy a theih anga tam chawipui ka duh a ni,” a ti.

United manager Ole Gunnar Solskjaer pawhin an keeper an thlun ngheh chungchang hi sawiin, “Hun rei zawk cham turin David-a’n a rilru a siam fel hi ka lawm em em a, tun hnaiah David hian khawvela tha ber a nih zia a lantir. Kan hmachhawpah David hi a tel a, Manchester United hi a hmun dik taka hung leh turin David hi a pawimawh dawn a ni,” a ti ve bawk.