Manchester City manager Pep Guardiola chuan mi tam takin khawvela manager tha berah ngai mahse manager tha ber a nih loh thu a sawia, tunah hian Manchester City nilo, club dang enkawl se a chet that loh tur thu a sawi.

Football chanchinah Guardiola aia manager ropui hi an tam lova, tunlai football khawvela manager tha ber anga ngai tu hi mi tam zawk an nih pawh a rinawm.

Guardiola hian trophy chawi loh a nei lo tih theih a ni a, Barcelona-a sulhnu ropui tak a hnutchhiah hnuah Bayern Munich chu Germany-ah hlawhtling takin a enkawl leha, Bayern chhuahsanin Manchester City chu tun hnaia England-a team tha berah a din leh.

Khawvela manager tha ber a nih leh nih loh chungchang zawhna chhangin Guardiola chuan, “Eng nge khawvela coach tha ber chu ni ang? Keichuan ka tha berah ka inngai ngai lova, chuti ang rilru chu vawi khat mah ka la pu ngai lo.

“Barcelona-ah title paruk a zawna ka lak te, treble ka lak te pawh khan manager tha berah kan inngai ngai lo. Khati anga title ka la thei kha club lianah player tha tak tak ka neih vang chauh a ni.

“Manager tha tak tak an awma, mahse ka player neih ang kha an nei lova, club liana awm lo te pawh an awm. Manager tha chu ka ni mahse a tha ber erawh ka ni lo. Manchester City ang nilo club hi min enkawl tir ula, ka che tha kher lovang,” a ti.

Pep Guardiola hian manager angin trophy tha hnem tak a chawi tawha, La Liga title pathum, Champions League pahnih, Bundesliga title pathum, Premier League title pahnih leh FA Cup pakhat te chu a title lak tam tak zinga a langsar zual te an ni.