Manchester City chuan RB Leipzig atangin  Josko Gvardiol an la lut fel ta a, kum 21 mi manah hian Europe Champions hian €90million (£77.6m, $98.6m) an seng nia report a ni.

Croatia International hian kum 5 chhung atan Etihad Stadium-ah contract a ziak a, nilaini khan club pahnih te chu Gvardiol-a chungchangah hian inremna an nei a, medical te an neih fel hnuin inrinni khan City chuan Gvardiol hi an defender thar a nih thu an puang ta a ni.

"Season liamtaa Manchester City khelh dan en te chuan, City hi khawvela team tha ber an nih zia an hre chiang vek ang.

"Pep Guardiola-a hnuaia thawhna hun remchang ka nei hi a ropui ta ti hle. Ka thlen tur ang hi ka la thleng lo tih ka inhria a, coach tha ber hnuaiah hma ka sawn ngei dawn e," tiin Gvardiol chuan a sawi.

Manchester City Football Director Txiki Begiristain chuan, "Ani hi uluk taka kan thlithlai a ni a, theihna sang tak a nei tih hi kan hria a ni.

"Josko hian thiamna chi hrang hrang a nei, Centre-half-a khel turin player tha fal bik a ni. A che rang em em a, a pumrua a tha bawk a, ball kangah a tha hle bawk. Tin, ball khalh thei tak niin, mize tha tak a nei bawk a ni," tiin an defender thar chungchang a sawi.

Tun nipui bazar inhawn chhungin Manchester City chuan player pahnih an lak luhna a ni ta a, Mateo Kovacic chu Chelsea atangin an la lut a, a chipui Gvardiol pawh an la lut chhunzawm ta bawk a ni.

Season liamta khan Gvardiol hian Leipzig tan game 41 a khel a, league table-ah pathumna niin, season tharah Champions League an khel dawn.

Season liamta Champions League Round of 16-ah khan Manchester City leh RB Leipzig te hi an lo inhmachhawn tawh a, khami tum khan Gvardiol hian goal a khung nghe nghe a ni.

Tin, he defender naupang hian World Cup khelh zawh takah khan a ram Croatia chu pathumna a nihpui a, City tlar hnung an zia chho leh dawn hle. John Stones, Ruben Dias, Akanji, Nathan Ake leh Laporte te nen inkhelhna hmun an inchuh chho dawn a ni.