10 Jan 2019 04:43

inkhel

Khawvela chungnung ber MC Mary Kom

India hmeichhe boxer ropui MC Mary Kom chuan a thleng sang sawt hle a, tun hnaia International Boxing Association (AIBA) in ranking an tih chhuah tharah a aia sang an awm lo a, World No. 1 nihna a hauh a ni.

Mary Kom hi nikum November thla khan Delhi khawpuiah 48 kg category ah a champion a, world title vawi ruk a la tling thei chiah a. World championship bikah chuan Mary Kom aia champion hnem an la awm lo a, he tournament-a boxer hlawhtling ber hi a ni.

Fa pathum nei tawh, Manipuri boxer hian 2018 kha a hmang tha hle a, Commonwealth Games bakah Poland ah te gold medal a la a, Bulgaria a Strandja Memorial ah silver medal a la bawk a. 2020 Olympic ah medal lak ngei a tum hle a, mahse 48 kg category a awm loh avangin 51 kg a tel theih a tum dawn a ni.

AIBA in ranking an tih chhuah tharah hian Mary Kom chuan point 1700 a hmu a, pakhatna hi a ni a. He ranking tharah hian Indian boxer dang Pinki Jangra chu 51 kg ah pariatna a ni a, Asian silver medallist Manisha Maun pawh 54 kg ah pariatna a ni bawk.

World silver medallist lo ni tawh Sonia Lather chu 57 kg category ah pahnihnaah a awm a, 2018 ah a duh ang takin a che tha thei chiah lo a, Asian Games ah khan medal a la thei ta lo a ni.

World bronze medallist Simranjit Kaur, hmanni lawka national champion ni bawk chu 64 kg category ah palina a ni a, he category ah hian world champion pawh lo ni tawh L Sarita Devi chu 16-na a ni bawk.

Inda Open gold medallist leh world bronze medallist Lovlina Borgohain chu 69 kg category ah parukna a ni.