July thla hian tun kum chhunga UFC event ropui ber tura ngaih UFC 226 a chhuak dawn a, he fight lo awm turah hian UFC Heavyweight Champion Stipe Miocic leh UFC Light Heavyweight Champion Daniel Cormier te chuan heavyweight title an inchuh dawn a, khawvel hmun hrang hranga MMA Sport ngaisang tak tan chuan en loh phal chi a nilo. Fighter pahnihte hi main event-ah an innuai dawn a, he fight lo awm tur hi UFC fight awm tawha ngahhlelhawm ber pawl a ni.

Champion thar in hmu ang- Daniel Cormier

UFC Light heavyweight Champion Daniel Cormier-a chuan champion thar a nih tur thu a sawi uar hle. Cormier-a hi light heavyweight champion a nih hma hian heavyweight lamah a khel thin a, light heavyweight lama a khelh hma hian UFC Heavyweight fighter tha ber pawl niin; heavyweight fighter rothap tak tak Roy Nelson, Josh Barnett leh Big Foot Silva te a lo hneh tawh. MMA fight a neih tawhah light heavyweight champion hlui Jon Jones-a lakah chiah a tlawm a, hemi fight lo awm turah hian a chak a nih hlauh phei chuan heavyweight division-ah hmachhawn a chak thu a sawi zui nghal.

Ka kutthlak a tawrh zawh ka ringlo- Stipe Miocic

Heavyweight Champion Stipe Miocic-a chuan Heavyweight Champion a kawllai chu humhim a tum hle niin a sawi a, palian zawk anih zia a lantir dawn niin a sawi zui bawk. A sawi zelnaah Miocic-a chuan an kutthlak a inthlau dawn niin a sawi a, wrestling-ah min luhpui hmain knockout-in a chak hman tur thu a sawi tel bawk. Wrestling lamah chuan Daniel Cormier-a tha zawk a tih theih anga, Olympic wrestler hlui anih vangte pawh a tih theih ang. Nimahsela Miocic hian wrestling lamah tawnhriat tam tak a nei a, high school a kal chhung zawngin wrestling a khel thin. Amah hi NCWA Division 1 wrestler anih mai bakah Cleveland Golden Gloves boxing champion hlui a ni bawk. Miocic hi a ban a sei zawk a, striking lamah chuan a that zawk rin a ni bawk.

Pay Per View record a siam rin a ni.

UFC 226 hian pay per view record a siam rinna a tam hle a, he fight card-ah hian Max Holloway leh Brian Holloway te chu an inbei dawn a, featherweight championship match a ni dawn a ni. Hei mai bakah Francis Ngannou leh Derrick Lewis an inbei dawn nen, anni hi tunlai fighter thlir hlawh ber pawl an ni mek. Hei mai a la nilo, UFC Lightweight champion hlui Anthony Pettis leh Michael Chiesa an intum dawn a, he fight card-ah hian kickboxer hmingthang tak Gohan Saki pawh a inlan dawn a, en loh phal chi a ni lovang.