​Khawvel nghahhlelh Khabib vs Poirier

26th June 2019, 04:06PM

Kumin chhunga Mixed Martial Arts khawvel nghahhlelh leh thlir chak em em mai chu a thleng thuai dawn a, tunlai khawvela tharum chakna hmanga tumpuite sawp hrep thin Khabib leh fighter rothap Dustin Poirier intum tur hi a ni awm e. Ufc lightweight Champion Khabib a phur tawh viau a, hetih lai hian Poirier a inringtawk viau bawk a, chak ngei tumin a inzir nasa tawh hle bawk.

Fighter pahnihte hi UFC 242, September thla lo awm tur hian an insual dawn a, lightweight title inchuhna a ni dawn bawk nen, khawvel mipuiin an nghakhlel tawh viau. Insual hmuhnawm tak ni ngei tura beiseina a sang viau a, thir hung chhunga an innuai meuh chuan chak zawk an awm a ngai si a, kumin chhunga insual hmuhnawm ber ni tura ringtu an thahnem hle a ni.

Tunge Dustin Poirier chu?

Mixed Martial Arts ngaina tan chuan hai theih a ni lo. Tunlai fighter zinga boruak siam ber niin; Octagon chhunga a insual hmuhnawm tak tak avangin a hming a chher hle. Round khelh zawh hmain UFC lightweight Champion hlui pahnih Anthony Pettis leh Eddie Alvarez a hneh tawh a, hei mai piah lamah round khelh zawh hmain World Series of Fighting Champion hlui Justin Gaethje a hneh nghe nghe. Octagon chhunga a inlan tawh chuan mipui lam pawhin a khel hmuhnawm an tiin; mipui au thawm pawh a ring tha thei hle. A hnek a na em em a, inpawmchilh lamah pawh a duailo hle bawk. A insual hnuhnung berah Featherweight Champion Max Holloway a hneh nghe nghe a, hemi tum hian interim lightweight championship match-ah an innuai a, harsatna lian tawk lovin Holloway lakah decision-in hnehna a chang a, an intum zawh hian damdawi inah Holloway hruai a ngai zui nghal nghe nghe. Heti khawpa fighter rothap niin; Khabib tum thei tur chuan ani aia phu an awm bik kherlo mai thei.

Poirier ka sawp rethei ngawt ang: Khabib

UfC lightweight Champion Khabib chuan a hneh ngei tur thu a sawi a, hei mai bakah thir hung chhunga an kalh hnan velah a tih dan tur sawiin, " Octagon chhunga kan insual hunah chuan ka buan chau dawn a ni tawp. Fighter tha tak chu a ni ngei mai. Kei min hneh tur erawhin a la tha tawklo. Thir hung chhunga min kalh hnan hunah chuan ka paihthlu ang a, hemi hnu hian ka hnek zui hrep ang, ," a ti thung.

Khabib hneh thei hmasa ber ka ni dawn: Poirier

Khabib chotu leh title chhuhsak ngei tumin Poirier a inzir ngawrh hle a, fighter tam takin an tih theihloh tih tumin a inbuatsaih nasa dawn tih a hriat. Dustin Poirier-a chuan, "Inbuan a thiam a, tharum a ngah tih chu kan hre theuh. Nimahsela kei anga fighter hi a la hmachhawn ngai lova, thir hung chhungah chuan ka kuttum a dawng mawlh mawlh dawn a, chutih hunah chuan khawvel hian champion thar a nei dawn a ni, " a ti thung.

Khawvelin a thlir chak tawh

UfC Fighter tam zawkin Khabib chak ngei turin an ring hlawm a, tharum leh fitness lamah ngat phei chuan chungnung turah an ngai nghet hle. Hetih lai hian Khabib-a hian boxing thiam tak lakah knockout hmanga a chakloh theihna a awm tih hi hmuh hmaih chi a ni awm lo e. Michael Johnson a hmachhawn tumin a talbuai teuh hle a, hemi tum hian Johnson-an a hnek fuh chiang deuh bawk a, a ke chheh a buai hman hle. MMA expert ngaihdan phei chuan a khabe ruh a invenglo leh thin a, tharum a neih em avangin a tumpuite a man fuh leh thei thin a, Johnson-a pawh a man fuh thei ta hlauh a, a chakpui ta nghe nghe bawk. Tharum a neihna hi an weight-ah phei chuan a hmang tangkai thiam nasa si a, Poirier-a kuttum thlAwk rang tak a dawng fuh anih loh chuan tharum chakna hmanga chak mai tura ringtu an thahnem hle a, khawvel hmaah champion nih ngei tumin fighter rothap pahnih an innuai dawn bawk a, insual hmuhnawm tak ni ngei tura beiseina a sang hle.

Copyright © inkhel.com 2024. All rights reserved.