Mixed Martial Arts khawvel nghahhlelh, palian huanga kutthlak na leh tuarchhel tak pahnih Daniel Cormier vs Stipe Miocic hmuh tur a awm dawn a, an intum hmasak lamin Cormier a chak, hemi tuma Cormier chak chhanah Miocic chetsual palh avang liau liau niin sawi a tam zui hle. Fighter pahnihte hi August thlaa UFC 241-a an innuai leh meuh erawh chuan chak tur rinthiam a har hle thung ang. UFC Heavyweight Championship match-ah a ni dawn bawk, hmuhnawm leh riap riap dawn e.
Fighter pahnihte intum tura ruahman anih hma hian Daniel Cormier vs Brock Lesnar-te chu UFC Heavyweight Championship match-ah insual tura beisei a ni thung. UFC 226 neih zawh hnu khan Lesnar-an Octagon chhunga Cormier a nem sawn dawrh a, UFC President Dana WHITE pawhin Cormier vs Lesnar a thlen ngei tur thu a sawi.
Hun a liam zela, Lesnar-a'n sum a tam tawklo chuan a inlan loh tur thu a sawi a, UFC lamin Lesnar-a duh ang an pe thei ta si lo. Fighter pahnihte hi an intum thei dawn ta lova. Hetih lai hian UFC Heavyweight Champion hlui Stipe Miocic leh UFC Heavyweight Champion Daniel Cormier kan hmu dawn ta thung. Fighter pahnihte hi an intum hmasak lamin round 1 naah knockout-in Cormier a chak anih kha. An insual leh tur hian khawvel titi a siam nasa a, chak tur rinthiam a har viau a, champion lai Cormier a vul chhunzawm dawn nge? Champion thar Miocic kan hmu ang.
UFC 226 khan Miocic leh Cormier insual hmuhnawm takah round 1 chhung lekin Cormier a chak a, Conor Mcgregor hnua a ruala weight hnih ngawta champion thei hmasa ber a ni zui. An insual hmasak hian Miocic a tlawm ngei mai. Hetih lai hian Cormier-an a hnek thluk hma kha chuan Miocic a chungnung zawk a tih theih ang. Hemi tuma an intum hma lawkin Cormier-a chuan, "Ka inpawmchilh pui anga, min man beh loh hunah remchang hmaih hauh lovin ka hnek thlu ang, " tiin a sawi a, hemi a sawi chhan chu Miocic a inven loh lai tak niin a sawi a, a sawi ang ngeiin Octagon chhungah a hnek tlawm zui nghe nghe.
Kumin August thla hian UFC 241-ah fighter pahnihte hi an insual leh dawn a, UFC Heavyweight Championship inchuhna tur a ni dawn bawk a, hmuhnawm riap riap hle tura beisei a ni. Miocic-a chuan, " Kan insual hmasak kha inhmuh chuan min hnek thluk hmaa ka thunun zia chu inhre ngei ang. Vanneih thil thu tak meuhin min hnek thlu a, khatiang kha a thleng nawn leh tawh lovang tih hi ka sawi duh. Ka champion belt hloh tawh ka la kir leh dawn a, UFC Champion thar ka ni dawn bawk" a ti.
UFC Heavyweight Champion Cormier erawh a inringtawk hle thung a, UFC 226-a thil thleng kha vanneih thil thu anih loh zia lantir a tum hle thung. Cormier-a chuan, "Stipe Miocic ka hneh kha mi thenkhat chuan vanneih thil thu angin an sawi a, Octagon chhungah ka lantir leh dawn a, knockout hmangin ka hneh leh dawn tih hi ka sawi duh. Fighter tha chu a ni ngei mai. Nimahsela fight IQ kan sawi dawn chuan min pha lo lutuk. Ka tumpui turte hi ka tum hma hian ka zir lawk thin a. Ka sawi tawh angin champion ka ni chhunzawm ang, " a ti thung.
Heavyweight Champion Cormier-a hian MMA record-ah Jon Jones vawi hnih a hneh tawh lova, hemi bak chu hnehloh a la tawnglo thung. Light Heavyweight huanga a khelh lai atang tawhin a tumpuite a hnehsawh thei hle a, tun thlenga a sawi uar em em erawh Jon Jones insual pui leh ngei a ni thung. Cormier-a chuan, Miocic ka hneh hnu hian a vawi thum nan Jones hmachhawn leh ngei ka duh a, Octagon chhunga ka inlan hnuhnung bera ka duhthusam a ni, " tiin a sawi.
Miocic hneh erawh kawng awlsam a ni dawn lo. Miocic-a hian khawvela hnek na bera an sawi Francis Ngannou a sawp hrep tawh a, hei bakah palian hrawl tak tak Alistair Overeem leh Junior Dos Santos-te chu harsa lo takin a lo hneh tawh bawk. Octagon chhunga a inlan leh hun chuan Cormier sawisak a chak thu a sawi a. An kawmnna pakhatah phei chuan, "Ka thil chak ka ti hlawhtling thei dawn ta a. Duhtawk maia Cormier -a hmai hnek ka chak tawh hle, " a ti.
Khawvelin Cormier leh Miocic insual tur hi a nghakhlel tawh hle a, kumin chhunga insual nghahhlelh ber pawl a ni hial awm e. Champion thar nih ngei tumin Miocic a inzir nasa dawn tih a hriat a, hetih lai hian champion lai Cormier erawh a awm mai mai dawn hauhlo thung. Mixed Martial Arts khawvel nghahhlelh, MMA heavyweight fighter piang tawh zinga tha ber zawnna ang hial pawhin a sawi theih ang. UFC 241-ah fighter tha zawk chu a hriat theih dawn a, khawvel huap fighter tha pahnih intum tur hi hmaih phal chi a ni lovang.