Khawvela entertainment sports-a en hlawh leh rorum ber ni chho mek Mixed Martial Arts game-ah Mizo tlangval Tv.Samuel Lalrozama Hmar s/o Dr, Thangchungnunga , Dawrpui chu khawvel mi thiam 21 thlan chhuah zinga official ve tura thlan a ni. MMA game hi Ultimate Fighting Championship (UFC)-in a rawn tihlar a ni a, India ramah pawh a țhang chho mêk a, tunah hian India rama body hlun leh lian ber chu All India MMA Association (AIMMAA) hi a ni.
National commissioner Daniel Isaac hnuaiah nasa takin hma a sâwn a, chumi hnuaiah chuan Mizoram State MMA Association (MISMA) pawh a in affiliate ve. Kum 2013 khan MISMA hi din a ni a, chuta țang chuan President- R.Zosangliana, VP- Lalrinpuia, GS- Michael L Pautu, Treasurer - Lalțhakima, State instructor- Deng Thanchhunga leh State commissioner- Samuel Lalrozama te kaihhruaina hnuaiah professional fighter pali leh international official pakhat a chher chhuak tawh a ni.
Kum 2015, July ni 6-11 hian Khawvela MMA amateur body lian ber International MMA Federation (IMMAF) chuan a vawi hnihna atan Las Vegas, USA-ah World championship huaihawt a tum a, chu event chu UFC in a sponsor tur a ni. UFC hian professional chauh a khawih vangin amateur level ațanga fighter te develop a duh vangin ram tinah amateur body hi awm se, a tițha leh thleng sangte chu pro ah hui luh a awlsam zawk dawnin an hria a, grassroot level development siamin, pro tur zawng nghal tawp lovin.
Chumi denchhen chuan IMMAF hi official takin a support ta a ni. Tun IMMAF 2nd amateur world championship atan hian khawvel pumah official turin mi 21 an thlang a; chutah chuan india ram ațangin official turin mi pahnih thlan an ni a – Prasad Gaitonde, Karnataka state hotupa (Judge) leh Samuel Lalrozama, MISMA (referee & judge). Samuela hi tunah hian india rama second most experienced referee a ni mek a, national level MMA coach niin India rama a țha pawl tia sawi a ni bawk. Mizo te pawh a lo train nual tawh a, tun aia nasaa thingtlang lamte zina talent țha zawng tura hma lak a tum. India ramah hian international referee hi mma ah hian pahnih chauh kan nei a ni. MMA circuit hi tih len tum a ni a, pro league te pawh huaihawt belha ‘Sports MMA’ pawh school games lama telhtir tum mek a ni. Mizoramah hian zirna changkang a la awm lo va, tunah hian mma gym changkang tak Dr. Joel Lalnghakliana Pautu leh MISMA țangkawpin an buatsaih mek a, Mizoramah mma league pawh huaihawt thuai tum a ni.
World championship tur hian India ram ațangin hming pali pek luh a ni a, chutah chuan hming pahnih hi an rawn thlang chhuak a. May ni 28 khan Bahrain lal ramah an lal fapa sponsor-in national leh international MMA event huaihawt a ni a, chutah chuan international referee zingah Samuel a hi tel vein head referee a ni nghe nghe a. Chumi hmunah chuan IMMAF president leh UFC representative te an tel ve a, Samuela leh Prasad-ate hnathawh hi an hmu a, tel ve ngei turin an confirm ta a ni. Heng official 21 thlan chhuahte hi UFC in a sponsor vek dawn a, an 5 star hotel thlen man, local transport leh ei man leh țul dang. IMMAF amateur championship ah dinhmun dang ber referee hna a chelh dawn bakah UFC-189-ah official a ni ve dawn bawk (back office lamah).
UFC leh IMMAF hian referee dinhmun hi an ngai serious hle a- an mahni pawh competent fighter, technical knowledge sang tak nei leh a țul pawha in fight ve thei tur an ni an ti a, chung te chu a paltlang vek a ni. India team ațangin fighter panga an tel dawn bawk. National commissioner Daniel Isaac chuan he thil hi India tana history siamna a ni tiin a ngai hlu hle a, media lam pawh theih tawp chhuah a theh larpui turin a sawm a ni. June 18 khan Samuela hian visa interview a hmachhawn a, tihfel sak a ni nghal a, official taka puan a nit a bawk a ni. Tin kum 2015-2016 chhung atan MISMA hi india rama mma top ten list a pakhatna hauh mek a ni a, Mizoram police department supportna vangin national body chuan lawm thu a sawi bawk. Mizorama fighter țha beiseiawm neih mêkte chu Deng Thanchunga, Zorammawia, Zorinmawia, Ngurlianzuala Sailo leh Lalrinawma te an ni.