NBA star Kyrie Irving chuan hun eng emaw chen khawvel chu a mum ni loin a phek a nih thu a sawi chungchangah tun hnaiah khan ngaihdam a dil.

American basketball player Kyrie Irving chuan tun hnai thla 18 vel chhung chu khawvel a mum loh thu leh kan chenna khawvel chu a phek a nih thu a tlangaupui nasa hle a. Tun hnaiah khan a ngaihdan a dik lo nia sawi chuang loin, mipui hriat tura a ngaihdan a lo tlangaupui vak vak avangin ngaihdam a dil a ni.

Boston Celtics star Irving chuan, “A hun lai chuan ka vei khawp mai a, rilruah hian a khat liam zawih zawih reng hi a ni ber a. Mi pawh an lo ni ve fo tawhin ka ring a, ka ngaihdan kha han sawi chhuah loha mahni chauha pai daih mai atan chuan ka ui ve em a ni,” a ti.

“Mi tam zawk pawhin an lo tawng ve tawh thoin ka ring a, YouTube velah a link kan han hawng a, a kaihhnawih thil a rawn indawt zut zut tawh mai a, rilru a hruai zui char char tawh mai thin a. Chuti taka kan vei tawh chuan sawi chhuah kan chak et et a, kan theihna apiangah kan thil vei, puak keh mai tura ngaih theih khawpa kan lo pai khawl chu kan sawi chhuak ta chiam mai a ni,” a ti bawk.

A sawi zelnaah, “Khatianga ka ngaihdan ka sawi chhuah thin avang khan mi tam takah nghawng a lo nei chho teuh mai a ni tih ka hre leh hnuhnawh a. Mi rilru ka hruai peng a, inhnialna te a chawh chhuah bakah mi thenkhatin an thil lo pawm sa te an rinhlelh phah bawk a. Heng avang te hian ka thil lo sawi chhuah tawhah khan ngaihdam ka dil a ni,” a ti.

February 2017 khan Irving hian kan chenna khawvel chu a phek a nih thu a sawi chhuak tan a. A team-mate pahnih Richard Jefferson leh Channing Frye te kaihhruai Road Trippin’ programme-ah a ngaihdan hi a sawi chhuak tan a. Kum 26-a upa Irving hian chutiang ngaihdan a neih hmasak berna pawh Instagram video vel atangin a nih thu a sawi a ni.