23 Mar 2020 02:21

bakteaJr.

Mizo tlangval

​Khawnge Pato a awm tak?

AC Milan atanga football khawvela rawn lar Alexandre Pato chu a thawm a reh ta hle a, mi tam zawk chuan a chanchin kan hre zui tawh lovin, a awmna chin pawh kan hre tawh lo.

Brazilian striker Pato hi a la inkhel ve renga, tunah hian a ram Brazil lamah awmin, Sao Paulo tan a khela, jersey no 7 a ha a, tunah hian kum 30 mi a ni mek.

Pato hi Brazilian club Internacional chhul chhuak a ni a, Internacional-ah hian Chelsea player thin Oscar te pawh an lo khel tawh thina, Pato pawh hi Europe-a a insawn hma chuan Internacional senior team-ah a khel.

Kum 2007 August thla ni 7 khan AC Milan chuan Pato hi Internacional atang hian an leia, a manah euro maktaduai 24 lai an senga hetih hunlai hian Pato hi kum 17 mi lek a ni nghe nghe.

Pato hi 2008-09 season chho atangin AC Milan tan a khel rim tana, kum 2009 a inher meuh chuan tlar hma lama Milan player pawimawh ber zinga mi niin, defender te tan tawh a khirh tawh hle.

Pato hi la naupang hle mahse club ropui tak AC Milan tan a pawimawh chho zela, a khelh that thin em avangin kum 2009 khan Serie A Young Footballer of the Year lawmman hlan a ni a, hemi kum vek hian Golden Boy Award a dawng bawka, ani aia player naupang beiseiawm leh huhang ngah an awm bik chuang lo.

Hliamin a tihbuai hma chuan Pato hi player tlanchak tak leh che rang em em , ball thiam bawk si a ni a, a khelh dan a fin em avangin khatih hunlai AC Milan manage Carlo Ancelotti chuan Pato hi Careca, Kaka, Romario leh Ronaldo te nen an thiamna a lo tehkhin sak fo thin. Pato hi striker angin khel hnem berin tha ber mahse striker thlawptu atan pawh a tha hle a, left wing leh right wing-ah pawh khelh tir a ni thina, a buai lem lo.

Kum 2009-10 season khan Pato hi che tha hle mahse Atalanta nen an inhmachhawn tumin a inhliam a, hamstring injury niin, hemi avang hian Roma leh Manchester United-te a hmachhawn thei lo. A hliam a dama a lo kir hnu lawkah Pato hi a inhliam zui leh deuh nghal maia hemi tumah erawh a season a tawp zui.

Kum 2010-11 season-ah Pato hi lo kir mahse a hliamin a kiansan hleithei lova, a khelh chhunah goal khung thin mahse a inhliam leh thin avangin chhawr theihin a awm lo fova, season chawhma lamah hian hamstring injury bawk nei lehin, kum khat a ral hmain a malpui tha ngai chu vawi thum a tih natna a ni ta a, a career in a tuar zui a tih theih hial awm e.

Kum 2010-11 season hi a hliam a dam hnuah tha takin a khel zova, mahse 2011-12 season-ah a ngai bawkin hliamin a tlakbuak chho leha AC Milan lamah pawh duh angin inkhelhna hmun a chang tam thei ta meuh lo.

Season lehah pawh hliamin a tihbuai reng avangin January thla kum 2013 khan Brazilian club Corinthians hnenah AC Milan chuan Pato hi an hralha, a man hi euro maktaduai 15 a ni. Corinthians atang hian Sao Paulo lamah kum 2014 khan loan-in an khela, kum 2016 January thla khan Europe-ah kirin Premier League club Chelsea chuan loan-in an la lut ve leh.

Chelsea tana a game hmasa berah Pato hian goal khung mahse, hemi season hian Chelsea tan vawi hnih chiah a inlana, Chelsea hian lei ngheh zai an rel loh avangin Pato hi Corinthians lamah a kir leh.

Kum 2016 nipui khan Villarreal chuan Pato hi an lei a, mahse a kum leh January thla maiah Chinese club Tianjin Quanjian chuan an lei a, hetah hian kum 2019 thleng awmin, kum 2019 March thla khan Brazil-ah haw in Sao Paulo-ah a luta, tunah pawh a la awm mek.

Brazil youth team lama player pawimawh a nih hnuah Brazil coach Dunga chuan Pato hi Kum 2008 Summer Olympics khan Brazil aiawh turin a ko va, hemi tum hian Brazil chuan Bronze medal an la, mahse kum 2010 World Cup khel tur khan Dunga chuan a ko lo thung.

Europe-a player naupang huhang ngah ber pawl ni thin Pato hi a malpui tha a dam that hleitheih loh avangin a career chu a hnungtawlh zawngin a kal a ni bera, AC Milan-a a chet that chhoh lai chuan mite mit fuk rawnna ni mahse eng a ni zui ta lo a ni ber a ni.