26 Aug 2015 10:16

Inkhel

Mizo Sports Website hmasa ber

Khawi position-ah pawh khelh ka huam - Fellaini

Zaninah United in Champions League play off ah Club Brugge an hmachhawn leh dawna, Maroune Fellaini chuan khawi position ah pawh khelh ngai se a enghelh loh thu leh chak chu a ngaihpawimawh ber a nih thu a sawi.

Van Gaal pawhin Fellaini chungchang sawi ve bawkin no. 6 emaw no. 8 position ah a khel thei ve ve a, tun season ah erawh player dang kan ngah avangin no.9 emaw no.10 position ah chhawr tam a ni ang tiin a sawi.

He Belgium international hian tun season ah United tan league game a la khel ve thei lova, season hmasaa an game hnuhnung berah khan Hull City lakah hnawhchhuah a tawh avangin game thum hrem a ni.

Kar hmasaa Belgian club an hmachhawn tum khan Fellaini hi United tan a inlan ve tawha, zanin 2nd leg match ah pawh a inlan leh ngei rin a ni.

£27.5 zet senga United in Goodison Park atanga an lakluh khan a chungah mi tam tak beiseina a sang hle a, Trafford-a a season khatna erawh a hmang chhe hle. Season hmasa khan attacking midfield position ah Van Gaal chuan a rawn hmanga, a ti fuh viau ni tur a ni, league match 27 ah goal 6 lai a khung ve ta nghe nghe a nih kha. Game 27 zinga game 14 chiah kha hun pum a khelh te an ni hlawm bawk.