Serie A-ah chuan Juventus a zawnin vawi 9 lai an champion tawh. Bundesliga-ah pawh Bayern Munich chu a zawnin vawi 8 lai an champion tawh bawk. League-ah an chungnung hle tih a chiang.
Tin, La Liga lamah pawh Real Madrid leh Barcelona bak sawi tur an tam lo hle bawk. Ligue 1 lamah pawh PSG an chungnung hle, 2012-13 season atang khan kum khat chiah champion loh season an nei.
Premier League erawh Manchester United-in an dominate em em hnu 2012-13 season hnulam atang khan Chelsea, Manchester City, Leicester City leh Liverpool te an champion tawh. Kum 10 chhung thlir let ilang chuan league hautak leh harsa ber chu Premier League a ni kan ti thei mai awm e.
Tun tum chu a tehfung hi season khat chiah hmang dawn ta ila. Tun season liamtaa league hautak ber eng nge? Tiin zawhna siam ta ila, kan tehfung tur nia lang chu champion team tena points an hlawhchhuah leh pahnihna te point hlawhchhuah inthlauhna hi a ni kan ti thei awm e.
Chutiang tehfung hmang chuan season liamta Europe League lian 5 te dinhmun thlir teh ang.
Ligue 1-ah PSG an champion, pahnihna Marseille niin point 12 laiin an inthlau. Bundesliga-ah Bayern Munich an champion, pahnihna chu Dortmund niin point 13-in an inthlau. Premier League-ah Liverpool an champion, league game 7 khelh tur a la awm tihin an champion tawh. Pahnihna Manchester City chuan point 18 laiin an phak lo. Heng league pathuma champion leh pahnihna-te inthlauhna hi point 10 chuang vek an ni.
La Liga-ah Barcelona-in hma an hruai ngar ngar a, covid-19 lockdown chawlh an hmang zo kha Barcelona an khel fuh hleithei lo, Real Madrid-in an umphak mai ni lovin point 5 laiin an tlansan ta kha a ni a. Real Madrid-in champion turin hna hautak tak an thawk tih a chiang.
Serie A hi tun season liamtaa champion tura beih nasat ber ngai tiin sawi ta ila kan sawi sual tam lovang. Juventus an champion a, pahnihna Inter Milan chuan point khat chiahin an phak lo. Tin, Atalanta leh Lazio ten champion team Juventus an phak lohna chu point 5 chiah a ni bawk.
Heti hian sawi ta ila, champion tura beih nasat ber ngai league (Tun season liamta) chu Serie A a ni a, Premier League-ah Liverpool chu fal takin champion mahse season tawp thlengin top 4 tur inbeihna a hmuhnawm kha a ni a, relegation battle pawh kha a tawp thlengin kan hmu bawk. Team tin tana league hautak chu Premier League a ni kan ti thei bawk awm e.