Khawhai Zone Football Tournament chu 9.3.2019 khan Riangtlei Playground-ah khelh zawh a ni a. Chalrang G&SA leh Vangtlang G&SA te chu final-ah an inkhel a, Chalrang G&SA chu 2-1 a chakin an champion.

Final-a goal lut hi Chalrang tan Ephraim Vanlalhriata leh Lalrinmawia te khung niin, Fair Play lawmman latu Vangtlang goal neih chhun hi Saidinga khung a ni

Champhai District chhunga Khawhai Zone-ah hian khaw 10 an awm a. Heng zing atang hian team 8 - Biate, Sialhawk, Tlangpui, Khawhai, Chalrang, Vangtlang, Riangtlei I leh Riangtlei II te chu tournament-ah hian an inlan a. Chalrang hian a tawp thleng hneh loh nei loa tournament hmachhawnin champion trophy an chawi ta a ni.

Chalrang G&SA team hi an khuaah ropui takin, YMA leh VC te huaihawta lo hmuah leh lawm an ni a. Zone level-ah an vawi 1 champion-na a ni.

He Tournament hi a sponsor tute hming chawiin Ralkhuma Memorial Trophy tia sawi a ni bawk a. Mizoram chhunga football club inelna sang ber, MPL player te pawh an kat nuk nghe nghe a ni.

Champion team Chalrang hian lawmman atan Rs. 20,000, trophy leh medal an dawng a. Pahnihna Vangtlang Team hian Rs. 10,000 leh medal an dawng bawk.

Kan hma lawkah hian Tuipui/Tuichangrala Zone hrang hrang, khaw 50 aia tam inelna lian tham Khawhai-ah a awm dawn a, he hun atan hian khaw hrang hrang inbuatsaihna a kal chho mup mup a. Mizorama footballer tha tak takte bakah, mipuiin kan la hriat em em loh player leh coach tha tak takte an fuankhawm dawn a. Local football ngaina tan chuan ngaihven tlak tak a ni ngei ang.