30 Aug 2018 01:11

inkhel

Khaw lum lutuk vangin US Open atangin mi 5 an inhnukdawk

US Open khelh mekah khaw lum lutuk avangin player thenkhat chuan harsatna an tawk chho a, ni hnihnaah chuan player panga ngawt mai an inhnuhdawh phah a ni.

New York khawpuiah khua a lum chho hle a, temperature chu 38C (100F) vel bawr niin, humidity level pawh 50% aia sang mah te a ni a. Hetiang taka khua a lum avang hian inkhelh pawh a hrehawm phah hle a, French player Julien Benneteau pawhin a chak hnuah chhunah chuan inkhelh loh ni se tha a tih thu a sawi.

World No. 60 Julien Benneteau chuan player thenkhat an inhnuhdawh phah chu a la zia zawk thu sawiin, a aia thil pawi a thleng ang tih pawh a hlauhawm niin a sawi a. Tournament huaihawttute chuan mipa inkhelh laiin kalphung an thlak danglam phah hial a ni.

Wimbledon champion Novak Djokovic chuan Marton Fucsovics chu hneh mahse khaw lum vang chuan harsatna lian tham tak a tawk tih a sawi a. Hetiang taka khua a lum avang hian player te taksa chu nasa takin a nghawng a, an nih tur ang an nih loh phah hle tih a sawi.

Thawhlehniah ringawt pawh player paruk te chu khaw lum vang hian an inhnukdawk niin United States Tennis Association (USTA) chuan an sawi a, inhnukdawk te hi Italian qualifier Stefano Travaglia, Lithuanian Ricardas Berankis, Argentine Leonardo Mayer, Russian Mikhail Youzhny leh Serb Filip Krajinovic te an ni.

Kum 36-a upa Mikhail Youzhny hian thla tharah khian tennis chawlhsan a tum tawh a, khaw lum lutuk vang hian Grand Slam tournament a khelh hnuhnun ber turah a tum loh dan deuhin a awm zui ta a ni.

Mipa lama khaw lum chawlhlawk an nei ang bawk hian hmeichhe lamah pawh chawlh lailawk hi an neihpui ve bawk a. USTA managing director Chris Widmaier chuan medical team te an rawn hnuah hetianga khaw lum vanga chawlh lailawk neih hi an rawt ta niin a sawi.

World No. 1 hlui Novak Djokovic leh a khelhpui Hungarian Marton Fucsovics te chu khaw lum vanga chawl lailawk hmasa ber an ni a. Hetianga an inkhelh laia an chawlh hian vurin an indep char char niin an sawi a, Fucsovics chuan khaw lum lutuk a inkhelh chu hrehawm a tih thu sawiin, an taksa tan pawh a hlauhawm a rin thu a sawi bawk.

Arthur Ashe stadium leh Louis Armstrong stadium-ah te hian a chung an khar phui a nih chuan air conditioning a awm lem lo niin USTA chuan an sawi a, court tidai thei turin zankhuaa a chung an khar chuan a ziaawm theih an rin thu an sawi bawk a ni.