Nizan (25/2/2020) khan Mizoram Super League Season 6 tan a ni a, Khatla TBL player Arshpreet Singh Bhullar chu a inkhelh hmain MSL Board-in an hrem nghal. He hremna chungchangah hian TBL lam leh MBBA (MSL Board) lam chu kan correspondent-in a be nghal a, hetiang hi thil kalhmang chu a ni.
Bhullar hi a tirin BFI hrem lai a ni tih club leh MBBA hruaituten ten an hriatpui, hetih lai hian engti ang chiahin nge hrem a ni tih erawh MBBA hian a hriatpui lo. Hremna order hi December ni 26-a chhuak a ni a, hei hi MBBA chuan BFI atangin an dawng lo. An theih ang tawka MBBA-in Bhullar hremna an zirchian hnuin Times of India-a tarlan chu an hrem dan niin an hria a, hetah hian South Asian Games-a inlan thei lo turin Bhullar hi hrem a nih thu tarlan niin hei vang hian MBBA chuan Bhullar hi MSL khel thei turah an ngai a, khelh an phalsak ta a ni.
Nikum November thla ni 6 khan Amjyot Singh leh Bhullar-te hi BFI Senior Camp, Bengaluru-a an awm laiin buaina an chawk chhuaka, zu pawh an in ngei tih finfiah a nih avangin hrem an ni. Amjyot hi an hremna order a chhuah atanga kum thum chhung BFI hnuaia affliliated association zawng zawnga khel thei lo tura hrem a ni a, Bhullar hi BFI hnuaia affliliated association zawng zawnga khel thei lo tura kum khat chhung hrem a ni ve thung.
Bhullar hian MSL khel turin screening a paltlang veka, February ni 25 zan khan Mizoram Super League tan a ni ta a, MSL tan dawn tak takah MSL khel tura Bhullar a inbuatsaihna te social media lam atangin BFI-lamin an lo hriat chuan MBBA chu phone-in an rawn hriattir a, MBBA chuan Bhullar leh midang an hremna order chu BFI hnenah a dil; BFI lam chuan dilna pangngai taka siam tura a tih hnuah MBBA chuan December ni 26, 2019 order chu February ni 25, 2020 khan an dawng ta a, Bhullar hi BFI hnuaia affliliated association zawng zawnga khel thei lo tura hrem a nih thu an hre leh hnuhnawh.
Hei vang hian MSL Board chuan loh theih lohin TBL player Bhullar chu a khelh an phalsak loh a ngai ta a ni. MSL a khelh theih tak lohah chuan sum tam tak senga an player lak an chhawr theih dawn loh bakah player thar lakna hun a awm tawh lo bawk nen, Khatla TBL tan chuan a pawi tak zet a ni.