21 Oct 2018 06:23

Inkhel

Mizo Sports Website hmasa ber

​Khabib leh Mayweather inhnek a thleng lovang: Dana White

UFC President Dana White-a chuan Khabib leh Mayweather inhnek chu a thlen a rinloh thu a sawi. White-a chuan, " Mayweather team nen pawh kan la sawi dun lova, hei mai bakah Khabib-a hian UFC-ah contract a nei mek bawka, Floyd hian intih lar a duhna mai niin a lang, " a ti.

UFC 229 neih zawh khan Khabib-a chuan social media kaltlangin Mayweather a cho thu a sawi a, fighter hnehloh la tawnglo pahnih kan ni bawka, kan sawifel ngei a ngai ang a ti a, hemi hnu lawk hian TMZ Sports-in an kawmnaah Mayweather-a chuan," Kan inhnek ngei ka ring. Kan intum anih chuan boxing ring -ah a ni ngei bawk anga, hei mai bakah pawisa tam tak hmuhna tur a ni dawn bawk nen, ka phur tawh hle a ni, " tiin a sawi.

Hetih lai hian UFC President Dana White-a chuan, " Tun dinhmunah chuan Khabib leh Ferguson insual hi mipui en chak ber a ni. Conor leh a team te hian rematch an duh thu min hrilh thin a, an la intum leh lovang tih a sawi theihloh. Tun dinhmunah erawh Mcgregor ai chuan Ferguson hian a phu zawka, inhliam lo se chuan title fight a neih ka ring tawh. Khabib leh Ferguson te an intum ngei theih nan hma kan la mek a ni, " a ti bawk.

Media thenkhatin a tarlan dan chuan Khabib-a'n title fight a neih leh tur atan Ferguson a hmachhawn duh niin sawi a awm a, hemi hnu lam chuan MMA chawlhsan a tum nia sawi a awm bawk. MMA expert tam tak chuan Khabib hneh tur chuan Ferguson aia tha an awmlo niin an sawi a, UFC Lightweight fighter Kevin lee phei chuan Khabib-a undefeated record titawp tura a rin ber anih thu a sawi zui nghe nghe.

Khabib leh Ferguson hian an weight-ah chuan fighter tha tiha an sawi chu an hneh deuh vek tawh. Khabib-a hian lightweight champion hlui Rafael Dos Anjos, Michael Johnson, Al Iaquinta, Edson Barboza te a lo hneh tawha, a fight hnuhnung berah a ruala weight hnih ngawta champion thei hmasa ber Conor Mcgregor-a chu 4th round submission-in a hneh bawk a ni. MMA record-ah mi 27 hmachhawn tawhin chakloh a la neilo. Hetih lai hian Tony Ferguson-a hian Rafael Dos Anjos, Lando Vannata, Josh Thomson, Gleison Tibau, Edson Barboza, Kevin Lee leh Anthony Pettis a lo hneh tawha, a fight tam zawk phei chu K.O leh submission-in a chak nghe nghe a ni.

Khawvelin Khabib leh Mayweather inhnek a beisei viau a ni thei, UFC President Dana White erawhin thil nuihzatthlak anih mai thu a sawi a, an inbeih a rinloh thu a sawi tel bawk. White-a chuan, " Social Media-ah Khabib leh Mayweather inhnek a thleng dawn tia sawi a awm a, Mayweather pawhin a sawi ngei bawk. UFC erawhin a thlen tir ka ring lova, Khabib leh Ferguson te intum tur a beiseiawm zawk, " a ti bawk.