24 Jan 2020 03:52

inkhel

Khabib leh Floyd Mayweather te an chotuah

Khabib Nurmagomedov chuan Floyd Mayweather nena inhnek chu a hreh lo a, chutiang an ti dawn a nih erawh chuan MMA huangah pawh an inhmachhawn ve ngei a ngaih thu Khabib-a pa chuan a sawi.

Tun hnaiah UFC star Khabib Nurmagomedov leh boxer chawl tawh Floyd Mayweather te poster an siam chawp chu internet velah a darh a, hei vang hian kum 42-a upa Mayweather chuan Nurmagomedov chu a koh chhuah phah a ni.

Floyd Mayweather hian Khabib a koh mai bakah Conor McGregor nen rematch neih leh pawh a hreh loh thu a sawi ri tan a. 2017 ah khan Mayweather chuan McGregor chu a lo hneh tawh a, sum tam tham tak mai an hui phah ve ve a ni.

April thlaah hian Khabib Nurmagomedov chuan Tony Ferguson a hmachhawn phawt dawn a, hemi hnua a awm zel dan tur chu sawi theih a la ni lo a. Khabib-a pa Abdulmanap chuan a fapa leh Irish fighter te chu insual leh mah se pawi an tih loh thu sawiin, chutiang tur erawh chuan pawisa tam tham deuh tak an dawn a ngaih tur thu a sawi a ni.

Abdulmanap chuan a fapa leh Tony Ferguson te insual hnuah Floyd Mayweather nen insual thei an nih thu a sawi chhuak a. Boxing ring chhungah tlema dan thlak danglam deuh chungin round 11 chhung an inhnek ang a, chumi hnuah MMA huangah round 1 chu an inhmachhawn ve leh a ngai niin a sawi chhuak.

An inhnek dawn a nih chuan Nurmagomedov hian Vasiliy Lomachenko pa, trainer lar Anatoly bakah heavyweight icon Mike Tyson te chu training petu atan a sawm dawn niin an sawi a ni.

“Mayweather hian record a nei tha hle a, vawi 50 a chak tawh a, chak loh hi a la nei miah lo a, boxing huangah chuan a aia ropui hi an awm lo a. Amah ang bawka record nei tha a hmachhawn duh a, vawi khat mah la tlawm bik lo Khabib Nurmagomedov nen inhmachhawn a duh a ni,” tiin Abdulmanap chuan a sawi.

“Floyd Mayweather hian Khabib hi rawn cho mah se tunah chuan hmabak chhawp sa kan nei mek a, Tony Ferguson nen an insual dawn a, hei lo hi chu thil dang buaipui thei kan ni rih lo,” a ti bawk.

A sawi zelnaah, “Tony Ferguson kan buaipui phawt ang a, chumi zawhah chuan Ukrainian boxer Vasily Lomachenko te team nen thla ruk chhung kan thawkho ang a, chumi hnuah boxing ring chhungah hmuh theihin kan awm ang,” a ti.

“Khawvela boxer ropui ber hmaah round 11 chhung kan ding ang a, chumi hnuah chuan MMA huangah round 1 chu kan chet ve leh ngei a ngai ang. Eng pawh ni se, Tony nen hian thil kan ching fel hmasa phawt ang,” a ti bawk.