05 Mar 2020 05:14

inkhel

Khabib leh Conor hmachhawn manah $600 million

Floyd Mayweather chuan boxing chawlhsan tawh mah se UFC star pahnih Khabib Nurmagomedov leh Conor McGregor te chu boxing ring chhungah ni khat thil thuah hmachhawn a hreh loh thu sawiin, chutiang thleng tur erawh chuan $600 million a phut thung.

2017 kumah khan Floyd Mayweather chuan boxing a chawlhsan thu a puang a. Nikumah khan UFC president Dana White nen an inbekbawr deuh a, hemi hnuah hian UFC star pahnih Khabib Nurmagomedov leh Conor McGregor te chu inhnekpui a duh thu a sawi chhuak zui a ni.

Kum 43-a upa Mayweather hian kum thum dawn kaltaah khan Conor McGregor chu boxing ring chhungah a hneh a, $300 million vel zet a lak luh phah a. Tunah hian zan khata UFC fighter lar pahnih hmachhawn hi a pawi tih loh thu a sawi chhuak.

American boxer Floyd Mayweather chuan, “Kei leh Dana White te chuan Conor McGregor nen inhnek leh chungchang te kan sawi a, Khabib Nurmagomedov nen inhnek chungchang te pawh kan sawi dun a ni,” a ti.

“Kei chuan chutiang a thleng leh dawn a nih chuan $600 million ka phut dawn a. Fighter lar pahnih hmachhawn tura ka pen chhuak dawn a nih chuan pawisa pawh a tam tham ve tur a ni,” a ti bawk.

Mayweather chuan Conor leh Khabib te a thlan chhan chu anmahni ram ve veah ngaihventu an neih that dun em vang niin a sawi a. A sawi ang deuh hian Conor McGregor chu Ireland lamah a tla na hle a, Dagestan lamah pawh Khabib Nurmagomedov chu a tla na viau bawk a ni.

“Boxing huang chhungah boxer pangngai ve mai mai hnek tura inlan leh chu ka tan awmzia a awm lo a. Kei hi chu sumdawngmi ka ni a, Conor McGregor nena inhnek te kha awmze nei a ni. Sum siamna a nih chuan awmzia a nei zel mai a ni,” tiin Mayweather chuan a sawi.