17 Oct 2020 05:53

inkhel

Khabib-a’n Conor chu title chuh tlak a nih loh thu a sawi

Khabib Nurmagomedov chuan Conor McGregor chu zu heh tak a nih thu sawiin, thil pakhatah rilru a pe rei thei lo a, kum upa zawk kutthlak a ching niin a sawi a, title chuh tlak a nih loh thu a sawi.

UFC lightweight champion Khabib Nurmagomedov chuan UFC 254 ah Justin Gaethje a hmachhawn dawn a. Fight Island-a a insualpui tur Gaethje chungchang sawi chhuak loin, a hmelma lian Conor-a chungchang a sawi chhuak daih a ni.

Tun hnaiah khan Khabib hian MMA reality show The Ultimate Fighter ah chuan Conor McGregor nen inlan dun a duh loh thu sawiin, $5 billion hlawh tur pawh ni se a inlan ve duh loh thu a sawi a ni.

Conor McGregor chuan kum thar January thlaah Dustin Poirier nena insual a remti tawh a, he mi hnuah hian kum 41-a upa boxing legend Manny Pacquaio nen inhnek an tum bawk a ni.

Kumin June thlaa UFC a chawlhsan thu puangtu, kum 32-a upa Conor hian Poirier a hneh a nih chuan lightweight title chuh thei dinhmunah a din theih hmel a. Heti a nih chuan a duhthusam Khabib nen insual nawn leh theihna kawng a inhawn ve theih a beisei hle.

Russian fighter Khabib chuan tun hnaia Yahoo Sport nen an inkawmnaah, “Conor McGregor hi ka hneh tawh a, eng vangin nge kan insual nawn leh kher ang?” a ti.

“A nihna takah chuan title chuh ve tlak a ni lo. Zu a heh si a, thil pakhatah a rilru a pe rei thei lo a, kum upa lampang kutthlak a ching bawk si. Hetiang mi hi ka ngaihtuah peih lo,” a ti bawk.

A sawi zelnaah, “The Ultimate Fighter-ah pawh hetiang mi nikhua lo tak nen lan dun hi ka duh lo hrim hrim a, theihnghilh hmiah hi ka duh dan ber chu a ni mai,” a ti.