Si hnih faia mikhual team-in hma an hruai hnuah, Arsenal chuan 3-2 in Bournemouth an lehthal. Hun tawp dawn tak takah Nelson chuan chakna goal a khung.

Emirates Stadium-a inkhel hmuhnawm tak khan sawi zui a hlawh hle, Arsenal fighting spirit ropui lutuk kha football pundi-te te chuan, champion an phu hle niin an ngai hlawm.

Arsenal leh pahnihna Manchester City te inkar chu point 5 a ni leh ta a, a tawp thlengin City hian an um dawn a, Arsenal pawh champion an tum tak tak a nih chuan chak loh chu sawi loh, draw pawh a thiang tawh dawn lo a ni.

Inkhelh zawhah Arteta chuan, "Game thunun kan tum, goal rang takin kan chhuah bawk si. Tlang sang tak lawn tur hmachhawp kan nei a, kan lawnchho bek bek.

"Goal khung duhin kan tuihal, goal kan han khung a, game a danglam chho ta vek. Reiss hi tun season-ah a inlan tam lo, a chhan chu a inhliam vang a ni a.

"A rawn lut a, tha takin a rawn khel, kan game boruak kha chu a ropui tak zet a ni. Ka hre reng tawh ang, a chhan chu chak duhna thinlung kan pu a, ka naute an hauisen em em tih ka hmu a ni.

"Game harsa takah pawh hnehna chan hi club lian te tih dan phung a ni, kan khingpui te kha an tha em em, kan tan pawh hmachhawn harsa khawpin an khel.

"Tunah chuan Europa League lam kan hawi tawh ang a, game khelh hmabak kan la ngah a, tu pawh a tha thei ang bera kan khelh chhoh zel a ngai tawh dawn a ni," tiin a sawi.