Kevin Durant zarah Warriors in Knicks an hneh

27th October 2018, 08:10PM

Kevin Durant chuan point 41 a score a, NBA champion Golden State Warriors chuan New York Knicks chu 128-100 in Madison Square Garden-ah an hneh.

Durant chuan, “Na taka nawr a, a tam thei ang ber thun kha ka tum tawp mai a. Third quarter-ah kan che fuh lutuk lo a, kha vang khan fourth quarter-ah ka tan lehzual phah a, kha khan min pui nasa hlein ka hria,” a ti.

NBA champion lai nih buaithlakna chu team dang zawng zawngte chuan hneh theih ngei tumin thapui nen an bei zel mai niin Durant chuan a sawi a. Hetih rual hian hetianga team dangte theihtawp chhuah zarah inthlahdah hman loa an awm theih phah chu tha a tih thu a sawi bawk.

He inkhelah hian Kevin Durant chuan fourth quarter bikah point 25 ngawt mai a thun a, Golden State hi fourth quarter bikah hian 47-16 ngawtin an chungnung a. An inkhelah hian Durant chuan 3-point vawi 9 ngawt mai a lut nghe nghe a, rebound vawi 9 a la bawk a ni.

Season tawp rualin Kevin Durant hi free agent a ni thei dawn a, Knicks chu Durant thlem tumtu zinga langsar ber pawl an ni mek a. An inkhelh dawna a hming an puan chuan mipui au thawm a ring hle a, Madison Square Garden-a an inkhelha bul chiaha billboard-ah Knicks zawm tura an tihna pawh lian deuhin an tar kuau a ni.

Stephen Curry chuan point 29 a thun a, 3-point vawi 6 a lut a, Madison Square Garden-ah hian 2013 khan Curry chuan a chet that ber tum tawngin point 54 ngawt a thun a ni.

Tim Hardaway chuan Knicks tan point 24 a thun a, Frank Ntilikina chuan point 17 a thun a, Trey Burke pawhin point 15 a thun bawk a ni.

Hmun dangah Kyle Lowry chuan point 20 a score bakah assist 12 a nei a, bul tan tha tak Toronto chuan 116-107 in Dallas Mavericks an hneh.

Kawhi Leonard chuan point 21 a thun a, Jonas Valanciunas chuan point 17 a score a, Danny Green chuan point 15 thunin Serge Ibaka chuan point 11 a thun bawk.

Mavericks tan DeAndre Jordan chuan point 18 a thun a, rebound 15 a la bawk a. Luka Doncic chuan point 22 a thun a, Wesley Matthews chuan point 21 a thun bawk a ni.

Toronto hi tun season-ah a zawnin vawi 6 an chak ta a. 2015-16 khan Toronto hi a tirah a zawnin vawi 5 an lo chak tawh a, tun season-ah an record hi an khum ta a ni.

Los Angeles Clippers chuan James Harden tel theih loh lai chu an chhawr hle a, Houston Rockets chu 133-113 ngawtin an hneh a. Harden awm loh lai hian Houston chuan point 24 thuntu Carmelo Anthony chu an rinrawl berah an hmang a. Chris Paul chuan point 12 thunin assist 8 a nei a ni.

Copyright © inkhel.com 2024. All rights reserved.