Kevin Durant zarah Warriors an chak

14th November 2018, 10:11PM

Kevin Durant chuan Nilaini khan point 29 a thun a, Golden State Warriors chuan 110-103 in Atlanta Hawks an hneh.

NBA champion Golden State Warriors te chuan Oracle Arena-a an inkhelh hma deuh hian chanchin an nei a, forward Draymond Green chu a hma niin Kevin Durant nen an inbakkaih a, Green hi an hrem phah a. Thawhtannia Warriors in 116-121 a Clippers a hneh loh tum khan Durant leh Green hi an inhnial hrep a ni.

He thil thleng avang hian Warriors thuneitute chuan an tih ngai zen zen loh thil an tih phah a, Green chu team tibuai zawnga mawi lo taka a chet avangin game khat khel thei lo turin an hrem phah a ni.

Atlanta Hawks nen an inkhelh hian Warriors chuan bul an tan tha lem lo hle a, halftime a thlenin Hawks chuan 52-49 in hma an la hruai a. Mahse second half-ah an harh chhuak a, third quarter bikah phei chuan an point hmuh hi 33-24 a ni a. Durant chu a che tha thawkhat hle a, point 29 a thun tling a. Klay Thompson chuan point 24 thunin Quinn Cook chuan point 18 a thun a, Jonas Jerebko pawhin point 14 a thun bawk a. Warriors chu Western Conference-ah an sang ber a, vawi 11 an chak tawh a, vawi 3 chu an tlawm tawh a ni.

Hawks player paruk ngawtin double figure an nei a, Taurean Prince chuan point 22 a score a, Kent Bazemore pawhin point 18 a thun ve bawk.

Denver lamah James Harden chuan point 22 a score bakah assist 11 a nei a, Houston Rockets chuan 109-99 in Denver Nuggets an hneh.

Season bul tan tha lutuk lo Houston chu vawi 6 an chak tawh a, vawi 7 an tlawm tawh bawk a, hei vang hian Denver hneh turin theihtawp chhuahin an nawr a, an thil tum chu an tihlawhtling ta a ni.

Houston Rockets player paruk te chuan double figure an nei a, Clint Capela chu point thun hnem ber niin point 24 a thun tling a, rebound 9 a la bawk a. Chris Paul chuan point 21 a thun a, James Ennis III pawhin point 16 a thun bawk.

Denver Nuggets tan Monte Morris chuan a thun hnem ber a, point 19 a thun a, Nikola Jokic chuan point 14 a thun bawk a ni.

Cleveland-ah che fuh thei rih lo tak Cavaliers chuan tun season chhunga a vawi hnihna atan hnehna an chang ve leh a, Charlotte Hornets chu 113-89 in an hneh.

Jordan Clarkson chuan Cavaliers tan a thun hnem ber a, Tristan Thompson chuan point 11 a thun a, rebound 21 a la bawk a ni.

Copyright © inkhel.com 2024. All rights reserved.