08 Jul 2019 05:34

inkhel

Kevin Durant-a’n No. 7 a ha dawn

Kevin Durant chuan Brooklyn Nets-ah a jersey number hak a thlak tur thu sawiin, No. 7 hak a tum niin a sawi.

Kum 12 chhung chu NBA khawvelah Kevin Durant hian jersey No. 35 a ha char char a, a khelhna a thlak thar takah chuan a jersey number pawh thlak a rilruk zui a. Bung thar a kai dawn avangin number thar pawh hi a hak dawn phah niin a sawi a ni.

Durant chuan, “35 khan kei leh ka chhungte chu Seat Pleasant, MD atangin min hruai kual a, khawvel min hrutpui a. Basketball ka khelh vang hian ka tawn miah loh tur leh ka hmelhriat miah loh turte ka hriat phah a, ka tih theih hauh loh tur thil tam tak ka tih theih phah a ni,” a ti.

“35 khan University of Texas-ah basketball khel thei turin min hruai thleng a, ka duhthusam thlentirin, Seattle-ah NBA khel thei turin min thlenpui zui a. 35 hian Oklahoma City-a basketball khelh min phalsak a, dam chhungin inzawmna nghet tak kan nei reng tawh dawn a ni,” a ti bawk.

A sawi zelnaah, “35 hian Bay Area-ah min hruai thleng a, championship title pahnih la theiin min siam bawk a. 35 hi ka tana mi pawimawh em em, keima hnaivai tak tana ka thlan a ni a; amaherawhchu, tunah chuan bung thar ka kai dawn a, hei vang hian ka number pawh a thar ka hmang dawn a, court chhunga min hmuh leh hunah chuan No. 7 ka ha tawh ang,” a ti.

Brooklyn Nets leh Kevin Durant te chuan kum 4 chhung atan inremna an ziak a, Nets tana kum li a khelh chhung hian Durant chuan $164 million a hlawh thei dawn a ni.

Kumin September thlaah hian Durant chuan kum 31 a tling tawh dawn a, postseason-ah a average chu 32.3 points, 51% field shooting, 44% 3-point range, 90% free throw line te a ni a NBA huang chhungah chuan postseason vawi khata game thum chhunga average point 30 nei thei hmasa ber a ni.

Pathianniah khan Nets chuan Durant chu an tlangzarh chiah a, kar hmasaah khan Golden State Warriors chuan Durant-a number hak thin 35 chu tu mah haktir an tum tawh loh thu an puang.