Tottenham leh Manchester United striker hlui Dimitar Berbatov chu Indian Super League (ISL)-ah kan hmu dawn tih a chiang ta a, Kerala Blasters FC-in season khat chhung atan an lalut.

Kum 36 mi Berbatov hian kum 2016-a Greek club PAOK FC a chhuahsan hnuin club a nei leh tawh lo va, Kerala Blasters FC hian biain India-ah an hruailut thei dawn ta ni.

Rene Meulensteen enkawlna hnuaia khel tur Kerala Blasters FC hian Manchester United player hlui pahnih - Wes Brown (defender) leh Paul Rachubka (goalkeeper)-te pawh an lalut tawh a, Berbatov hian Ian Hume leh CK Vineeth-te tlarhma lamah elpui tur a nei ang.

Bulgaria Footballer of the Year vawisarih ni tawh Berbatov hian kum 2008 September thla khan Tottenham chhuahsanin Manchester United a zawm a, Red Devils-ah hian kum 2012 thleng khelin Premier League nomawi vawihnih a chawipui a League Cup-ah vawikhat a champion pui bawk.

Kum 2012 August thla khan Manchester United hi chhuahsanin Fulham-ah a lut a, hemi hnu hian Monaco leh PAOK-ah a khel leh a Greek club hi 2015-16 season tawp hnuin a chhuahsan.

Berbatov hian Bulgaria tan game 79 khelin goal 48 a khung hman a, kum 2012 September thla khan ram tan inkhelh a chawlhsan a Bulgaria tana goal khung hnem ber a ni bawk.

Tottenham-a Berbatov kawppui thin Robbie Keane pawhin ATK a zawm tawh a, Kolkata club hian an head coach thar atan Manchester United striker hlui Teddy Sheringham an lalut tawh bawk a ni.