Pathiannia Carabao Cup final-ah Chelsea goalkeeper Kepa Arrizabalaga chu coach Maurizio Sarri-a’n thlak a tum a, mahse Kepa hi a chhuak duh tlat lo a. Hemi chungchang hian sawi a hlawh hle a, inhnialna pawh a tam phah hle a. Kepa hian thil a tisual nasa viau em? FIFA dan a bawhchhe chiah em le?

Kepa chungchang kha
Manchester City leh Chelsea te’n Carabao Cup final an khelh khan hun pangngaiah chak zawk an la awm lo a, hun pek belhah pawh an la inhnehtawk zel bawk a. A tawp lamah Chelsea goalkeeper Kepa Arrizabalaga chu a inhliam niin a hriat a, hei vang hian manager Maurizio Sarri chuan Kepa chu lak chhuah a, a aiah Willy Caballero chu luhtir a tum a ni.

Hun a tawp dawn tawh a, team pahnihte chuan penalty shootout hmangin chak zawk an zawn ngei hmel a. Argentine keeper Willy Caballero chu penalty save thei deuh mai a ni thin a, hei vang hian Sarri pawhin luhtir a duh tel deuh bawk a tih theih a. Caballero hian kum hnih kalta khan Manchester City tactic a hriat chian avangin penalty-ah a lo tihrilhhai tawh bawk a ni.

Khelmual chhunga awm mek Kepa chuan tum dan dang a nei tlat mai a, Sarri ruahmanna chuan awmzia a nei ta lo a. Chelsea staff te hnenah Kepa chuan a khelh chhunzawm theih tur thu a va hriattir a, electronic board an lek chhuah dawnah pawh a chhuak duh tlat lo a. An goalkeeper chet dan avang hian Chelsea technical staff te chu an thinrim hle mai a, goalkeeper chuan an club thuneitute thutlukna a ngaipawimawh lo lui a, hruaitute a zah lo hle tiin an lawm lo hle a ni.

Tunhma deuhin
Football khawvelah Kepa Arrizabalaga chauh hi thlak an tum laia chhuak duh lo a ni bik lo a, a hma pawhin player thahnem tak chuan boruak an lo nei tawh a. Footballer langsar tak takte pawh an bang chuang lo a, Cristiano Ronaldo, Lionel Messi leh Carlos Tevez te pawh heng zingah hian an tel tawh a ni.

A hmaa thlak an tum, chhuak duh lote thawm hi a ri ring ve vak lo a, a chhan bulpui ber nia lang chu manager te’n player te duh dan chu an ngaihpawimawh sak a, khelmuala hun hman an la duhna chu hrethiamin an thil tum pawh an thlak danglam thin a, a hnuah engmah an sawi zui ngai lo a ni ber.

April 2017 khan Swansea leh Tottenham te chu an inkhel a, hemi tum hian Swansea goalkeeper Lucasz Fabianski chu a inhliam a. Manager chuan Fabianski hi lak chhuah a tum a, mahse goalkeeper hi a chhuak duh tlat lo a, an team chuan an tuar zui a. Goalkeeper tihsual vangin an lamah goal a lut a, an chak loh phah a ni.

Kepa chungchangah khan electronic board-a number pawh an ti eng tawh a, Sarri chuan goalkeeper chu chhuak turin a duh tih a chiang hle a, mahse a chhuak ta si lo a ni.

FIFA danah engtin nge a awm?
Khawvel pumpuia football lampanga thuneihna sang ber neitu FIFA chuan dan chi hrang hrang a duang teuh a. Khawvel hmun hrang hranga football lampang khaikhawmtu an ni a, rualkhai taka khelh a nih theih nan dan pawh an zam uluk hle.

Player thlak tur, chhuak duh lo chungchang hi dan an neihah pawh sawi tel chu a ni ngei a, Law 3 hnuaia player chungchang sawinaah thui vak loin a awm a. “Player chu thlak an tum a nih a, a chhuak duh lo a nih chuan, inkhel chu chhunzawm zel tur a ni,” tih chauhin a awm.

FIFA dan berin hetiang chauha a tarlan avang hian inhnialna chawk chhuaktu ber Kepa hian dan tlawhchhan zawnga thlir chuan tihsual hranpa a nei lo a tih theih chiang a. A fuh lo lai ber chu club mawi lohna a ni a, manager leh an club inkaihhruaina a ngaipawimawh lo tihna a ni bawk a. Chuti tih lohah chuan FIFA dan bawhchhiat chu a nei lo chiang a ni.

Engtin nge ni zel ang?
Kepa awm zel dan tur ngaihtuah hian hmabak a thim hle a tih theihna lai a awm a. Kawng khat atanga thlirin, manager Sarri thinlungah a tla na tawh dawn lo chiang a, manager berin a duhsak loh chuan khelhna hmun a chang tam thei tawh dawn lo a, Tottenham nen an inkhelh pawhin a khel lo chiah a ni.

Pakhat lehah chuan, Tottenham nen an inkhelhin Caballero a che tha hle a, clean sheet a nei thei a, bul tantu atan a iaiawm lo riau a, Kepa mamawhna a lian lo thei dawn a ni.