​Keita lakah Liverpool an beidawng?

25th March 2019, 08:03PM

Liverpool chuan nikum nipui laia an lakluh Naby Keita chu beisei a phak loh avangin chhuah tir leh mai an hreh lo niin chanchinbu mite chuan an tarlang.

Liverpool hian Keita hi kum 2017 khan an lei fel tawh a, a manah pound maktaduai 52 lai an seng. Kum 2017-ah inlei fel tawh mahse nikum nipui atang khan Keita hian Liverpool hi a zawm fel chauha, a season hmasa berah beisei a pha lo tih chu phat rual a ni lo.

RB Leipzig tan a khelh that thin em avangin Liverpool pawhin kum 24 mi tan hian sum an seng tlem lo hle a, a chungah rinna an nghah zia ti lang turin an captain kal chhuakta  Steven Gerrard-a hak thin jersey no.8 chu Liverpool hian Keita an pe nghe nghe.

Keita duhtu zingah German club pahnih Bayern Munich leh Borussia Dortmund-te hming a langsar hle a, mahse Liverpool hian Guinea captain tana an sum sen zat erawh an hmu let thei tawh kherin a rinawm loh.

Liverpool chuan Keita hi an hralh dawn a nih chuan pound maktaduai 10 vel tal an hloh a ngai dawn niin a langa, mahse kawl reng ai chuan tih ral chu a tha zawkin Liverpool lamin an ngai niin chanchinbu mite chuan an tarlang.

Keita hian Liverpool midfield-ah hmun lailum a chang thei meuh lova, Reds tan vawi 27 khel tawh mahse inkhel bul a tan khat hle. Liverpool manager Jurgen Klopp chuan Keita aiah James Milner, Fabinho, Jordan Henderson leh Giorginio Wijnaldum-te a thlang zawk a, Keita tan hmun chan leh mai a awlsam dawn lo.

A khelh khat bawk si avang hian Keita pawh hi a chhuak hrehin a rinawm lova, a lo chet that tawhna thin Bundesliga lam pan a, German club lian ber ber tana khelh chu a hnial a rinawm loh hle a ni.

Copyright © inkhel.com 2024. All rights reserved.