Manchester United manager Jose Mourinho chuan Premier League team lian dang zawng zawngin hma an sawn vek laiin United chiahin hma an sawn ve loh thu a sawi.

United hian nipui bazar chhungin Fred Leh Diogo Dalot bak player lakluh mumal an nei lova, team lian dang Tottenham tih loh erawh chu an in la tha nual. Mourinho chuan season liamta khan an chet that thawkhat thu leh, fak an phu anga fak an hlawh loh thu a sawi tel bawk.

Mourinho chuan, “A sang pali nen hian heti takin kan inthlau ang tih hi ka ring ngai lo. Thil chu a tha lam zawngin kan thlir a, kan inkar a zauh lutuk loh kan beisei thin. Season liamta khan fak kan phu angin fak kan hlawh lova, Premier League-ah pahnihna niin, FA Cup final kan khel bawka, chu mai bakah kan Champions League group-ah pakhatna kan ni bawka, kan phu angin tumahin min fak lo.

“Tun season-ah team dangten hma an sawn veka, an that belh vek. Spurs chuan player lalut lo mahse an player tha zawng zawng an chelh a, chu ai tha chu a awm chuang lo. Team zawng zawngin hma an sawnin an that belha, keini chiahin hma kan sawn ve lo,” a ti.

Sawi belin Mourinho chuan, “Southampton kan hmachhawn hma darkar thum awmah khan ka khelhtir turte ka la hre lo. A khel thei tur leh khelh thei lo tur kha kan hre chiang har hle,” a ti bawk.

United hi tunah hian pariatnaah an awm meka, palinaah awm Arsenal chu point riat laiin an pha lova, season tharah Champions League an khel duh a nih chuan United tan tlawm a thiang tawh lo tluk a ni a, Mourinho hnuaiah eng nge an an zel dawn tih chu football khawvel ngaihven ber zinga mi a ni.