17 Oct 2020 05:50

inkhel

Keimah vanga che fuh lo kan ni: Solskjaer

Ole Gunnar Solskjaer chuan a dinhmun chu a buaithlak rih viau tih sawiin, tun hnaia an chet fuh theih loh chhan ber chu amah vang a nih thu a sawi.

Manchester United chuan 2020-21 Premier League season bul an tan tha lo hle a, an game hmasa berah Old Trafford-a an mikhual Crystal Palace chuan 3-1 in an hneh nghal a. An game hnihnaah Brighton chu sawisel hlawh takin 3-2 in an hneh hlauh a, an vawi thum inkhelhnaah an mikhual Tottenham Hotspur chuan 6-1 ngawtin an sawp leh bawk a ni.

Zaninah hian Newcastle United khelmualah an inlan dawn a, he mi hma hian United manager Ole Gunnar Solskjaer chuan a hmaa an chet fuh loh chhan chu tu dang vang ni loin ama thiamloh a nih thu a sawi chhuak.

Solskjaer chuan, “Tun season-ah bul kan tan tha lo viau mai a, hei hi tu thiamloh mah a ni lo a, mawhpuh tur dang hi an awm lem lo. Ka mawhphurhna a ni a, keima thiamloh a ni a, engkimah min mawhpuh vek rawh u,” a ti.

“Season liam ta pawh kha a khirh viau tho a, game 9 kan khelhah vawi khat chiah kan chak thei a. Chutih rual chuan Manchester United player leh staff te hian hetiang boruak hi ngaiah kan nei tawh a, rilru paukhauh tak pu chungin hma lam pan zel kan tum thin,” a ti bawk.

A sawi zelnaah, “Tunah pawh hian kan insang mar ang a, hma kan sawn chho leh ngei ang tih kan ring tlat a. Dinhmun tha vak lo atangin hmun sang takah kan lawn chho thei a ni tih kan lantir theihna hun a inher chhuak mek niin ka hria,” a ti.

“Tlema kan chet fuh loh deuh emaw hian player te an sawisel vak thin a, hei hi a dik chiah lo ka ti a. Manager chuan mawhphurhna a la tur a ni a, team chet fuh lohna chhan chu amah hi a bulpui a ni zel zawk a. Kei pawh hi min dem rawn luai luai mah se ka pawm thlap ang,” tiin Solskjaer chuan a sawi a ni.